橙新聞

珍寶豬@診所低能奇觀

任職十幾年嘅診所助理,全科普通科做過,專科做過,連精神科都..……

【診所低能奇觀】病人叫醫生執牛屎

文:珍寶豬@低能
   
有日有位妹妹嚟到診所。
   
佢靜靜行埋嚟望住我,我問佢:「妹妹,你係咪睇醫生呀?有冇大人陪你嚟呀?」
      
佢放低一袋藥上枱面,冇出一句聲。
   
我:「做咩呀?袋藥你嘅?」
      
佢推前袋藥,打打眼色示意我睇睇,我拎啲藥出嚟望:「配藥呀?」
     
佢擰頭。
   
我依照藥袋上嘅名搵返藥主人,發現係一位成年人嘅。
    
我:「呢個係你媽媽呀?」
  
佢點頭。
   
我:「咁啲藥有咩問題呀?你媽媽叫你攞過嚟做咩啊?」
    
佢冇出聲。
    
我:「…咁我一係打俾佢問吓咩事啦~電話係咪登記嗰個XXXX-XXXX?」
    
佢點頭。
    
【診所低能奇觀】病人叫醫生執牛屎

(圖:視覺中國)

電話接通,我:「喂~你好,請問係咪XXX小姐呀?我係乜乜診所嘅姑娘呀」
   
佢:「哦,係呀?咩事呀?」
    
我:「你小朋友拎住你前幾日包藥嚟診所,不過佢就唔出聲唔講我知咩事,所以打嚟問吓你係咩事啊。」
    
佢:「佢真係低能,少少嘢都做唔嚟」
   
我:「…咁請問係咩事呢?」
    
佢:「哦,我見啲藥食咗好耐都冇效呀,唔知係咪擺耐咗,你叫醫生換過批新嘅俾我啦。」
    
我望望啲藥只係比原先少咗三次份量:「你食咗三次咋喎?醫生開俾你嘅係四日藥,一日食四次啊。」
    
佢:「三次都冇效呀!我都未好返喎,我而家仲係咁呀。」
    
我:「過咗咁多日,我哋換唔到藥俾你㗎喎~你覺得唔OK嘅,應該第二日就過嚟同醫生講㗎。」
     
佢:「咁我唔要啲藥,你退返錢俾我算啦,反正我食唔食都冇所謂」
     
你份人咁賴皮,我真係好歡喜~
    
我:「藥我哋唔會退㗎,因為我哋都冇得再用返」
    
【診所低能奇觀】病人叫醫生執牛屎

(圖:視覺中國)

佢:「我又唔係退底褲?又唔係貼身衣物?點解唔俾退呀?就算係底褲,我冇著過都可以退啦,我話冇著過就冇著過㗎啦。」
     
香港多得有你呢啲客人啊~
     
我:「我哋冇得退㗎。」
    
佢:「好!你唔俾退呀?我全家唔再嚟睇醫生!睇你幾時執囉,早啲退休返歸執牛屎囉!我冇所謂㗎!」
       
嘟。佢收咗我線。
     
我望住妹妹講:「妹妹,拎返袋藥返屋企俾你媽媽啊」
     
妹妹唏噓擰頭離開診所:「唉!」
     
點解你哋咒咗醫生執咁耐,醫生都仲未退到休?
      
       
責編:李玥展

編輯:Stacy

編輯推薦

【診所低能奇觀】太太逼工人姐姐打避孕針?!

太太:「我有俾錢佢㗎!告咩呀?要告都係我告佢勾引我老公啦!成日化妝化到雀咁!搏咩呀?搏我老公望你一眼呀?」

2018-07-16 11:06

【診所低能奇觀】鬼仔性格

佢:「收工收工收工,淨係識講收工,香港人打工淨係識講收工。」

2018-07-06 09:39

【診所低能奇觀】投訴L

佢除低佢副太陽眼鏡:「我要你幫我做啲嘢」。

2018-07-01 10:20

熱門評論

已複製連結