橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】無綫體育組解散 專業不敵速食必招後患

文:方以文
  
無綫裁員消息一浪接一浪,先有負責海外出版發行嘅TVBI,再有負責播放前最後把關嘅Broadcasting Operation,又有將外購節目重新包裝嘅Repackaging Team,傳聞話仲會陸續有來。無綫話係架構重組,身為觀眾就唔清楚咁多,但我收到消息,內部人士都覺得有啲道理,畢竟電視行業近年變化迅速,無綫一直落後,依家先醒覺,轉唔切身就只好瘦身,係邊個嘅責任就大家自行評論。
  
【方以文 | 睇乜電視啊?】無綫體育組解散 專業不敵速食必招後患

李克勤都話得到消息「心裡不是味」

【方以文 | 睇乜電視啊?】無綫體育組解散 專業不敵速食必招後患

(圖:李克勤Instagram)

對於觀眾最大衝擊嘅,係同樣遭到滅門嘅體育組,因為佢哋製作嘅體育品牌節目《體育世界》要一齊死,結束38年嘅播放生涯。喺體育組滅門消息傳出之時,高層放風聲話希望以後國際體壇盛事可以由政府出錢買播放權喺港台電視播。姑勿論之後係咪打算拎港台電視嘅訊號再轉播,但就明顯話畀大家知,無綫唔再用錢喺體育節目度。
  
點解體育組要死呢?好多人話高層覺得體育組賺唔到錢,所以要滿門抄斬。但我覺得準確啲嚟講的話,只係比其他節目賺唔到咁多錢,而呢個情況應該會好快有所改善。通訊局已經開到聲話植入式廣告冇問題時,體育組就必然係眾多體育相關產品同活動嘅重要合作部門。依家冇咗,體育相關廣告商就冇咁容易諗起無綫,自己閂自己一條路。
  
無綫依家覺得搵錢要快要容易,養住30人體育組博之後會有廣告,覺得唔值。咩叫容易?就係拍個冇新意嘅節目,製作人員可以照板煮碗,用最少嘅創作力去完成,然後就叫客戶贊助同落廣告。最佳例子就係飲食同埋旅遊節目,將個贊助商產品夾返落去以前做過嘅節目套路就得,賣到客收到錢為上。咁創意呢?唔值錢呀,又要浪費時間去解釋畀啲客聽嘛,唔做囉。
  
咁嘅情況之下,影響就係你依家有眼見到嘅綜藝節目不停都係食同旅遊。長遠有咩影響呢?就係唔甘心嘅創作人士會自動流失,電視台冇咗班有執行力嘅創作人,到廣告客戶有朝一日頂唔順啲炒冷飯節目希望有新嘢時,電視台就企咗喺度。到時一係就冇橋賣,一係就有橋但執行力差,客戶流失,電視台到時又要節流裁員,無限循環。
  
【方以文 | 睇乜電視啊?】無綫體育組解散 專業不敵速食必招後患
【方以文 | 睇乜電視啊?】無綫體育組解散 專業不敵速食必招後患

無線2013年成立體育台

以體育部為例,對無綫嘅捐失,其實隨時大過觀眾。因為冇晒專門採訪同拍攝體育項目嘅人,試諗吓如果大型體育公司同佢合作,你都唔知賣乜好。到時先搞個無聊綜藝,叫出名嘅藝員做主打,都要有專家旁住先得,始終專業先係賣得錢。你自己冇專業人才,要外援,隨時揸頸就命,何況大台又點會甘心請外援呢?唔甘心都得,咁依家就要立即搞好個marketing同sales方針,唔好淨係靠速食,唔係以為靠《東張西望》一個節目救到全家啩?
  
一間娛樂為主嘅公司,靠食老本玩速食唔行專業化一定搞唔掂。最新嘅BigBigShop,其實面對同一個困局。我點解要聽一個非專業嘅主持人介紹,睇完節目之後仲要神心到去你個平台度買嘢呀?新鮮感冇咗,下次肥媽都唔知仲可以賣幾多個煲。何況呢個只係副業,做好節目,以專業吸廣告客戶先係王道。
責編:李玥展

編輯:Stacy

編輯推薦

【方以文 | 睇乜電視啊?】綜藝節目首集播精華係咩玩法?

點解一個綜藝節目好地地,總要喺第一集用啲時間去講一次成個節目咁多集會有啲咩嘢睇呢?

2018-06-29 10:46

【方以文 | 睇乜電視啊?】新台請好好把握世界盃機會

有人希望新台可以靠世界盃吐氣揚眉,挫一挫無綫氣焰。不過世界盃對於兩個台嚟講,唔係此消彼長嘅對戰。無綫流失嘅收視,唔見得會流去ViuTV。

2018-06-15 09:32

【方以文 | 睇乜電視啊?】《全民星戰》出咗咩問題?

《全民星戰》呢個遊戲節目搵外援林敏驄同梁漢文做主持,再加上明星足球隊全力支援做嘉賓,但效果就真係差得緊要, 一個遊戲節目唔緊張唔好笑冇氣氛,到底出咗咩問題?

2018-05-10 10:17

熱門評論

已複製連結