橙新聞

珍寶豬@診所低能奇觀

任職十幾年嘅診所助理,全科普通科做過,專科做過,連精神科都..……

【診所低能奇觀】太太逼工人姐姐打避孕針?!

文:珍寶豬
有日一對夫婦加埋一個工人姐姐嚟到診所。
  
太太自己一個人行埋嚟:「姑娘,係咪有避孕針打呀?」
  
我:「有呀,一個月一次嗰隻嚟嘅。」
  
太太:「好呀,打一枝呀,幾耐有效㗎?」
  
我:「第一次打嘅,都係建議頭一個月最好用埋其他避孕措施,最近嗰次經期係幾時啊?」
  
太太嗌向遠方:「喂,你上次M到係幾時呀?」
  
工人姐姐:「我…唔知呀。」
  
太太:「扮咩唔知呀?你唔好扮嘢呀。」
  
工人姐姐臉有難色:「太太,我唔想打針呀。」
  
太太:「唔咩打呀?冇得你唔打呀!我話要打就要打!」
  
工人姐姐:「唔好啦太太,我同先生真係冇嘢呀。」
  
【診所低能奇觀】太太逼工人姐姐打避孕針?!

(資料圖)

太太:「個個有嘢都話自己冇嘢㗎啦!」,坐另一邊嘅先生一臉無奈搖頭。
  
太太擰轉頭同返我講:「唔知幾時M到可唔可以照打呀?」
  
我望望坐喺度垂垂頭喪氣嘅姐姐,同太太講:「但係姐姐佢唔想打喎,冇得迫佢打㗎喎」
  
太太:「唔駛理佢呀!我廢事佢哋搞個仔出嚟,仲要我養埋呀!」
  
我:「但係打針呢啲一定要係打嗰個自願嘅,唔可以因為你係僱主就迫佢打㗎」
  
太太:「你係咪唔識聽中文呀?我哋都女人嚟㗎,你幫外人唔幫我?」
  
工人姐姐都係女人啫。
  
【診所低能奇觀】太太逼工人姐姐打避孕針?!

(資料圖)

我:「我怕太太你第日俾人告返轉頭咋,真係唔可以迫㗎~」
  
太太:「我有俾錢佢㗎!告咩呀?要告都係我告佢勾引我老公啦!成日化妝化到雀咁!搏咩呀?搏我老公望你一眼呀?」
  
我望望姐姐。化到成隻雀咁係咪嗰少少紅色唇膏呀?
  
我:「冷靜啲先,呢度有其他人喺度…你一係返屋企同佢傾好咗先再嚟打啦,就算打都要知佢對上一次經期係幾時嘅。」
  
先生行埋嚟拉住太太走:「走啦,下次先過嚟啦」
  
太太好嬲:「你呀!以後唔好俾我見到你望佢呀!唔好同佢講嘢呀!」
  
先生:「我都講咗好多次我同佢真係冇嘢,佢都四十幾歲啦,你都已經專登揀個咁嘅,你都仲要咁?」
  
太太揮袖:「我點知你會唔會突然轉口味呀?」
    
先生都廢事出聲…齊齊跟住嬲爆爆嘅太太走~
  
如果轉口味嘅,可能會轉咗你先…
  

責編:李玥展

編輯:Stacy

編輯推薦

【診所低能奇觀】鬼仔性格

佢:「收工收工收工,淨係識講收工,香港人打工淨係識講收工。」

2018-07-06 09:39

【診所低能奇觀】投訴L

佢除低佢副太陽眼鏡:「我要你幫我做啲嘢」。

2018-07-01 10:20

【診所低能奇觀】有位男士話:有啲魚走咗入我嘅……

佢做出陶大宇經典掩臉動作:「哎,你唔明呀?係咪即係冇得睇呀?」

2018-06-21 11:50

熱門評論

已複製連結