橙新聞

珍寶豬@診所低能奇觀

任職十幾年嘅診所助理,全科普通科做過,專科做過,連精神科都..……

【診所低能奇觀】鬼仔性格

文:珍寶豬
  
有日有位小姐喺截症後嚟到診所。
  
我:「小姐~我哋截咗症㗎啦,你去睇吓仲有冇其他診所啦」
  
佢:「咩嘢叫截咗症呀?」
  
我:「即係我哋收工~」
  
佢:「收工?仲有人喺度呀?」
  
我:「佢哋係最後㗎啦,唔再登記㗎啦」
  
佢:「我喺美國返嚟,唔係好熟你哋」
  
【診所低能奇觀】鬼仔性格

(圖:視覺中國)

我都唔識你呀,門口嗰邊。
  
我:「哦?係呀?我哋收工㗎啦,今日冇得睇㗎啦,你出去搵吓其他診所啦」
  
佢:「OH?你係香港人嚟㗎?咁冇人情味嘅?咁樣對一個病人?」
   
我:「唔好意思呀小姐,我哋醫生已經由今朝睇症睇到而家,十二個鐘有多㗎啦,醫生都需要休息嘅,我哋都係。」
  
佢冷笑一下:「我真係唔係好熟你哋,而家香港人係咁㗎?」
  
我:「你不如出去睇吓仲有邊間診所有得睇啦~我哋今日已經冇得睇㗎啦。」
  
佢:「我走咗幾年,爭啲廣東話都唔記得點講,原來而家啲人都變成咁。」
  
唔係呀,你啲廣東話講得幾好呀。
  
佢繼續講:「其實你哋醫生唔睇我唔CARE我真係冇咩所謂,不過我覺得你哋好冇人情味囉,以前嘅香港都唔係咁,見到有人需要幫就會幫㗎啦。」
  
我:「請問小姐你有邊度好唔舒服需要醫生幫呀?」
  
佢:「我冇舒服呀,唔舒服嘅我唔會去你呢啲診所睇啦,我睇開私家」
  
我哋係公立咩?
  
【診所低能奇觀】鬼仔性格

(圖:視覺中國)

我:「咁你有咩需要我哋幫你呢?」
  
佢:「我今日返工嘅,係呀,我一返到嚟就有大公司請咗我。」
  
我:「所以呢?」
  
佢:「我今日要買張SICK LEAVE,買埋聽日都得。」
  
可能你離開咗香港啦,可能你唔知香港醫生係唔可以咁樣『賣』病假紙啦~可能你鬼仔性格啦。
  
我:「小姐,我哋冇病假紙賣㗎,麻煩你離開診所啊,我哋要收工㗎啦」
佢:「收工收工收工,淨係識講收工,香港人打工淨係識講收工。」
  
我:「你連工都唔返,梗係唔駛講收工啦,你再磨爛席過咗十二點嘅,就搵唔到診所拎今日病假紙㗎啦!大公司好嚴㗎!冇病假紙當曠工㗎~香港地生活壓力大,好多日日更年期嘅阿頭㗎~」
  
佢眼啤啤離開診所。
  
責編:李玥展

編輯:Stacy

編輯推薦

【診所低能奇觀】投訴L

佢除低佢副太陽眼鏡:「我要你幫我做啲嘢」。

2018-07-01 10:20

【診所低能奇觀】有位男士話:有啲魚走咗入我嘅……

佢做出陶大宇經典掩臉動作:「哎,你唔明呀?係咪即係冇得睇呀?」

2018-06-21 11:50

【診所低能奇觀】我睇唔到醫生 你哋唔駛旨意走

一位攞完藥嘅後生仔準備離開,姨姨繼續大字型:「我冇得睇,你都唔俾走!」

2018-06-05 14:24

熱門評論

已複製連結