橙新聞

辦公室日報x聶瞳

我哋呢幫打工仔,一生一世為錢幣做奴隸。

【辦公室日報|聶瞳】誠信於你而言,值何價?

文:聶瞳
  
最近有個客搵我出廣告,最初報價嘅時候已經提過要prepayment,即係先畀錢,因為過往吃虧太多,而家嘅政策係合則來不合則去,你認為可以接受,我會交足功課,但如果不能接受,歡迎客官搵一個可以畀你拖數嘅page去完成,先小人後君子,係最好同埋最聰明嘅合作方式。
   
個客一口答允,不過廣告趕住出街,最終我同埋會計小姐都開綠燈。只係我哋非常黑仔,因為對方原來係一個冇信用,亦唔重視誠信嘅人。Prepayment冇履行,延期嘅日子一改再改,個客對住會計小姐仲相當無禮:「得啦,咁細數,走你咩!」
   
【辦公室日報|聶瞳】誠信於你而言,值何價?

(圖:視覺中國)

經驗話畀我知,講得呢句嘅客九成都會拖數,但基於對人嘅信任,我哋照出廣告,後來個客已經發展到唔覆email,有時好難相信世界上會有呢種人,你諗下呢句「得啦,咁細數,走你咩!」就係咁細數都畀唔到,先至係最大問題。
     
最後個客用咗最下三流嘅手段去圓謊:「寄咗票啦,你哋會計同事都覆咗email通知收到。」點解唔搵一個聰明啲嘅藉口?你可以賴郵局寄失,但覆過email係有得check架醒目仔。
      
我好少理會畀錢問題,EQ唔好,鬧起人上嚟真係屬於颶風級別,而且手上好多稿未完成,都係做返份內事先。不過呢單嘢就令會計部同事好扯火,因為已經唔係遲找數問題,而係你擺咗人上枱,將個波射畀人,侮辱緊別人嘅專業。
    
【辦公室日報|聶瞳】誠信於你而言,值何價?

(圖:視覺中國)

銀碼多與少唔係重點,我最重視你嘅誠信,一個冇誠信嘅人,喺任何行業都好難立足。好快會被淘汰,因為你個名已經破產,曾經畀你呃過嘅人會好有戒心,亦唔會再同你合作。天下品牌何其多,將來唔接你嘅廣告,一樣可以做其他廣告,但你嘅誠信係一世跟住你,如果一個人嘅名聲就係值咁多,係一件好悲哀嘅事。
    
出嚟社會打工又好,做生意都好,有信用絕對係成敗關鍵,銀碼只係一個數字,承諾先至係最重要。
     
   
責編:李玥展

編輯:Stacy

編輯推薦

【辦公室日報|聶瞳】茶餐廳的童話故事

大把廢人爬上高位個個月出份天價人工,亦有好多人勤勤力力但依然飾演嘍囉角色,一分耕耘一分收穫有時只係童話故事。

2018-06-21 11:50

【辦公室日報|聶瞳】如何面對假民主嘅老闆同上司

好難服侍?後來我每份工都遇到呢類人,爭在個病有幾嚴重?假民主到咩程度?而呢種情況通常都發生喺上司同老闆身上。

2018-06-08 12:16

【辦公室日報|聶瞳】當你遇到一個揀平唔揀靚嘅老細……

有時只係差一千幾百,老細都會試個平嘅,唔使解釋啦,慳得就慳吖嘛,佢哋會覺得全部求職者都有手有腳,咁既然一個萬五,一個萬四,梗係揀萬四啦。

2018-05-23 12:25

熱門評論

已複製連結