橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】綜藝節目首集播精華係咩玩法?

文:方以文
  
有件事諗咗好耐都諗唔通,唔知大家有咩睇法?就係點解一個綜藝節目好地地,總要喺第一集用啲時間去講一次成個節目咁多集會有啲咩嘢睇呢?用半集時間已經係濕濕碎,有啲會用晒第一集去做介紹,對我嚟講係件趕客嘅事。
    
 【方以文 | 睇乜電視啊?】綜藝節目首集播精華係咩玩法?

(圖:ViuTV)

呢個習慣無綫、ViuTV、奇妙都有,最近一次出現,就係新台嘅節目《返歸啦俄仔》。第一集用差唔多一半時間去講之後嗰幾集做乜,其實我想單刀直入睇Ansheles喺俄羅斯做啲咩呀。對於一直等緊呢個節目出街嘅我嚟講,除咗電視台自己嘅宣傳片之外,主持人甚至係幕後人員,都有喺自己嘅社交平台介紹呢個節目,我已經非常之清楚,頭嗰半集對我嚟講係多餘嘅煎熬。
   
或者有人會話等緊個節目播嘅觀眾就覺得多餘啫,咁唔係等緊嘅觀眾,同埋一啲咁啱開着部電視嘅觀眾呢?對佢哋有冇作用,吸唔吸引到佢哋睇個節目呢?
  
 【方以文 | 睇乜電視啊?】綜藝節目首集播精華係咩玩法?

(圖:ViuTV)

嗱,如果個節目係唔好睇嘅,剪咁多往後嘅片段出嚟只會自暴其短;如果個節目係好好睇嘅,剪呢啲精華出嚟又係嘥氣,會減低之後睇時嘅樂趣。即係話無論個節目好唔好睇,第一集播精華片段都係對吸引觀眾繼續睇係冇幫助,反而有可能變咗趕客。
     
咁點解會有呢個習慣出現呢?真係唔知。就算係之前免費電視仲係主流娛樂消遣嘅時代,我都唔知呢個安排有咩價值同意義。到咗今時今日,我對一個電視節目有興趣就睇,冇興趣就唔睇,大把其他娛樂我揀,你夾硬喺第一集sell我,唔只冇用,仲浪費我時間。不如第一集第一分鐘就直入主題,用真功夫吸引人去睇好過啦。再出呢招「首集播精華」,我只會諗係咪拍唔夠片所以要嚟充撐時間⋯⋯
   

編輯:Stacy

編輯推薦

【方以文 | 睇乜電視啊?】新台請好好把握世界盃機會

有人希望新台可以靠世界盃吐氣揚眉,挫一挫無綫氣焰。不過世界盃對於兩個台嚟講,唔係此消彼長嘅對戰。無綫流失嘅收視,唔見得會流去ViuTV。

2018-06-15 09:32

【方以文 | 睇乜電視啊?】《全民星戰》出咗咩問題?

《全民星戰》呢個遊戲節目搵外援林敏驄同梁漢文做主持,再加上明星足球隊全力支援做嘉賓,但效果就真係差得緊要, 一個遊戲節目唔緊張唔好笑冇氣氛,到底出咗咩問題?

2018-05-10 10:17

【方以文 | 睇乜電視啊?】 日劇《大叔的愛》折射香港欠創作階梯

無綫同埋ViuTV,甚至係買咗好多香港電視製作嘅奇妙電視,仲有借ott復活嘅亞視,理應好好諗吓,盡快開返試新嘢嘅平台,先係長遠之策。

2018-05-23 10:43

熱門評論

已複製連結