橙新聞

珍寶豬@診所低能奇觀

任職十幾年嘅診所助理,全科普通科做過,專科做過,連精神科都..……

【診所低能奇觀】投訴L

文:珍寶豬
   
有日一位小姐嚟到診所。
  
佢一行埋嚟登記處,我已經感受到佢嗰股火焰,我:「小姐,係咪睇醫生呀?」
  
佢除低佢副太陽眼鏡:「我要你幫我做啲嘢」。
  
是臥底行動嗎?餓底我是可以的~臥低亦可以。
   
我:「咩事呢?一係我同你登記睇醫生先?」
  
佢:「我要你寫封信證明我食咗啲咩!」
  
啊,咁應該要挖開你個胃睇睇先啊,希望你啲胃酸未溶晒啲嘢食又或者你咀嚼得唔太爛啦~如果唔係成PAT嘢,話你食咗屎都唔出奇。
  
【診所低能奇觀】投訴L

(圖:視覺中國)

我:「啊?你證明嚟做咩呀?」
  
佢:「我要用嚟投訴間爛鬼舖頭呀!」
  
我:「我哋證明唔到㗎…你食咗啲咩我哋唔會知唔會查到~」
  
佢:「咁我點告點投訴呀?」
  
我:「你食完唔舒服咩?」
  
佢:「係呀!如果唔係我做咩投訴呀?」
   
我:「咁你之前有冇睇醫生有冇入院呀?」
  
佢:「冇呀!少少唔舒服睇咩醫生入咩院呀?」
  
少少嘢你又投訴又告?你個人都幾矛盾…
  
我:「咁…你而家仲好唔舒服?」
  
佢:「冇啦,仲有事嘅我去咗見上帝啦」
   
可能上帝都唔想見到你。
  
我:「咁即係而家乜事都冇,之前又冇人證明過你有唔舒服,咁呀…冇人理㗎喎?」
   
佢:「咩嘢爛鬼診所呀?你係咪第一日返工呀?」
   
我:「如果要去到告人哋食肆咁大陣仗,你都應該食物中毒或者屙到入院呀」
  
佢:「我有常識知道咁樣唔駛入院㗎嘛!月經流量多咗駛咩入院呀?吓?」
    
…你M血多咗關食肆咩事?你自己走去拎人哋碌掃把棍搞搞震嚟呀?掃把棍都未投訴你,你投訴人哋啲乜呀?
      
我:「…冇人會證明到你流量多係關佢哋事啊」
   
佢:「我自己知㗎嘛!」
  
佢再手指指講句:「得!我唔駛你做啦!你收皮啦!」,之後就離開了。
  
點睇都似你收先。   
  
  
責編:李玥展

編輯:Stacy

編輯推薦

【診所低能奇觀】有位男士話:有啲魚走咗入我嘅……

佢做出陶大宇經典掩臉動作:「哎,你唔明呀?係咪即係冇得睇呀?」

2018-06-21 11:50

【診所低能奇觀】我睇唔到醫生 你哋唔駛旨意走

一位攞完藥嘅後生仔準備離開,姨姨繼續大字型:「我冇得睇,你都唔俾走!」

2018-06-05 14:24

【診所低能奇觀】男朋友的疑惑

佢終於大聲少少:「我係話我要唔要帶條女嚟同我睇醫生呀?」

2018-05-18 09:54

熱門評論

已複製連結