文：珍寶豬
有日一位男士嚟到診所。
圖：視覺中國
佢行埋嚟登記處嗌我：「小姐？小姐？」
我放低啲文書工作，抬起頭：「係～係咪登記？」
佢講得好快：「你哋睇唔睇呢啲魚？」
我：「唔好意思？我聽得唔係好清楚，咩魚話？」
佢：「你唔好咁大聲，你細聲啲得唔得？」
我：「啊？唔好意思，你介唔介意講多次頭先講嘅？咩魚呀？啃到魚骨呀你？」
佢：「有啲魚走咗入我下體」
…….你對啲魚做過啲咩嚟？點會走到入你下體呀？魚苗應該都唔得啦下嘛？
我完全諗唔明：「你指係生勾勾游緊水嗰啲魚？」
佢做出陶大宇經典掩臉動作：「哎，你唔明呀？係咪即係冇得睇呀？」
我：「我唔係好明係咩魚會走到入去下體…如果真係嘅話，你應該去醫院喎？」
佢：「衣魚呀」
衣魚喎？成日喺書堆中生活嗰啲喎？你對啲書做過啲咩嚟呀…
圖：視覺中國
我：「食書嗰啲呀？好長條觸鬚嗰啲？」
佢：「咩嘢書同觸鬚呀？小姐你係咪玩我呀？我唔係同你講笑㗎！」我覺得似係你玩我多啲啊。
我：「唔好意思，因為我諗唔明點樣會走咗入去…如果真係入咗去嘅，我哋診所幫唔到你㗎，一係你去醫院啦」
佢：「咩呀？有幾難明呀？咪做愛惹返嚟囉，你唔係連咩叫做愛都唔知呀？我問人話可以過嚟睇嘅？佢話佢上次都係咁過咗嚟嘅？佢驗咗都係衣魚呀」
…你同條衣魚做愛？你同條衣魚做愛？你同條衣魚做愛？你同條衣魚做愛？你同條衣魚做愛？你同條衣魚做愛？你同條衣魚做愛？你同條衣魚做愛？你同條衣魚做愛？你同條衣魚做愛？衣魚要爆開了！
我一臉正經：「先生，你係咪想講衣原體？」
佢：「我一直都係講緊呢樣！」
OK！登記睇醫生！
Facebook專頁：http://www.facebook.com/funnyclinic
責編：李玥展
