橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】新台請好好把握世界盃機會

文:方以文
  
下筆時世界盃舉行在即,新台千帆並舉,自製節目近乎全部都同足球有關,收視可唔可以借住體育盛事有所突破就拭目以待。 大台方面擺出一副冇事發生嘅姿態,世界盃期間星期一至五2230嘅綜藝線戰,打頭陣係第二輯《 Ben Sir睇樓團》,之後就會係方東昇嘅《長命百二歲》。有人話無綫嘅戰意薄弱,我就覺得根本唔係呢回事。
  
【方以文 | 睇乜電視啊?】新台請好好把握世界盃機會

資料圖

播世界盃,搶到嘅觀眾係球迷,無論你做乜都好,一播波就點留都留唔住佢哋,我估無綫一早睇穿,所以做返最基本嘅嘢打穩守,留住班忠實粉絲,無驚喜係正常嘅。依家播緊嘅《深宮計》同埋《飛虎之潛行極戰》仲要去到極致,以舊品牌留客。《深宮計》老套到極,但女人鬥法似乎留得住班固有嘅觀眾,跨平台收視有27點左右。反而將飛虎卧底溝埋一齊嘅《飛虎之潛行極戰》,就要計埋喺翡翠台播之前喺myTV SUPER嘅點擊率先博到去25、26點。世界盃期間,似乎無綫想繼續試觀眾對於翻炒舊橋嘅耐力。
   
【方以文 | 睇乜電視啊?】新台請好好把握世界盃機會

《深宮計》劇照(圖:微博)

有人希望新台可以靠世界盃吐氣揚眉,挫一挫無綫氣焰。不過世界盃對於兩個台嚟講,唔係此消彼長嘅對戰。無綫流失嘅收視,唔見得會流去ViuTV。依家嘅情況係無綫可以當世界盃冇到,反而新台面臨一次機不可失嘅時刻。正如以上所講,兩個台嘅觀眾幾乎唔會重複,所以新台今次嘅目標唔應該係搶無綫嘅觀眾,而係培養一班新觀眾,而呢個都係一個台可唔可以有穩定收視嘅原因。我認為新台喺世界盃期間應該:第一,介紹自己嘅藝員畀觀眾認識。第二,喺世界盃時間極速培養同觀眾之間嘅感情,等佢哋喺世界盃播完之後會繼續睇99台。
  
不過似乎新台冇打算趁世界盃時間去強化返自己嘅體育節目品牌以留住呢班喜歡運動(至少喜歡足球)嘅觀眾,最直接嘅體育節目係睇晒32隊參賽隊伍嘅《我們的世界盃》,不過都似乎唔夠以體育做切入點去講運動員人生嘅《挑戰1997》得到嘅迴響咁大。其實點解唔畀新台自家製體育節目品牌《體育係…》翻生?可以借住世界盃再谷吓喎。
  
至於介紹藝員畀觀眾認識呢方面,又做成點呢?為世界盃而生嘅非純體育節目,有日日同你倒數開幕嘅《全港的》、又有《返歸啦俄仔》同埋《世界盃稀客》,仲有只係喺Facebook有得睇嘅每日8小時直播節目《衝三小橫衝直播俄羅斯》。你可能到睇呢篇文先發現,原來ViuTV有咁多抄熱世界盃氣氛嘅節目,不過就算好睇都起唔到乜效果,因為宣傳力度落晒喺「重頭節目」《全民星戰》,其他節目播咗你都唔知。
  
【方以文 | 睇乜電視啊?】新台請好好把握世界盃機會

(圖:TVB)

可惜由梁漢文、林敏驄領軍嘅第一季《全民星戰》節目整體唔吸引,亦都唔夠時間畀自己藝人show off,到依家差唔多做完都冇乜迴響,近乎冇新台藝員跑出。嚟緊第二季6月18日開始由杜汶澤做主持,如果節目內容排陣係差唔多,我諗都冇乜機會畀新台自己人發揮,只係寄望杜汶澤主持會好睇啲吸引啲,叫做有啲機會畀觀眾望到ViuTV有咩人。另一個新重頭節目、每晚賽事前做直播嘅《全民睇波派對》,希望ViuTV可以作出調整,畀多啲機會自己友,如果唔係就完全浪費晒世界盃呢個畀觀眾認識ViuTV嘅大好機會。
   
責編:李玥展

編輯:Stacy

編輯推薦

【方以文 | 睇乜電視啊?】《全民星戰》出咗咩問題?

《全民星戰》呢個遊戲節目搵外援林敏驄同梁漢文做主持,再加上明星足球隊全力支援做嘉賓,但效果就真係差得緊要, 一個遊戲節目唔緊張唔好笑冇氣氛,到底出咗咩問題?

2018-05-10 10:17

【方以文 | 睇乜電視啊?】 日劇《大叔的愛》折射香港欠創作階梯

無綫同埋ViuTV,甚至係買咗好多香港電視製作嘅奇妙電視,仲有借ott復活嘅亞視,理應好好諗吓,盡快開返試新嘢嘅平台,先係長遠之策。

2018-05-23 10:43

【方以文 | 睇乜電視啊?】VR驅魔人:勇氣可嘉 貪心累事

ViuTV自從2017年10月播完由陳奕迅主演、莊梅岩編劇、陳志發監製執導嘅《短暫的婚姻》,事隔半年終於有自家製港劇播返,由王貽興同埋劉翁自編自導自演嘅《VR驅魔人》 打頭陣。20集劇由開播到完結,唔少傳媒都全力...

2018-04-23 16:17

熱門評論

已複製連結