橙新聞

辦公室日報x聶瞳

我哋呢幫打工仔,一生一世為錢幣做奴隸。

【辦公室日報|聶瞳】茶餐廳的童話故事

文:聶瞳
      
【辦公室日報|聶瞳】茶餐廳的童話故事

(圖:視覺中國)

窮則變,變則通,高學歷加埋高薪厚職,邊個唔想擁有?我當年都差啲因為屋企嘅經濟變化而要輟學,至於高薪同埋厚職,始終都要睇際遇嘅。大把廢人爬上高位個個月出份天價人工,亦有好多人勤勤力力但依然飾演嘍囉角色,一分耕耘一分收穫有時只係童話故事。
   
最近聽到朋友講佢老公嘅奮鬥史,令我覺得做人肯動腦筋真係可以發圍,先天係重要,但係後天都唔可以忽視。所以一眾輸在起跑線嘅人,包括我自己在內,真係唔好就咁認命。睇多啲嘢,行多幾步,絕對可以開闢一條康莊大道,好多成功嘅例子都係由天馬行空開始。
  
我朋友個老公唔算好有學識,幾年前仲失業,有次佢哋兩公婆去茶餐廳食嘢,發覺啲碗碗碟碟同埋刀叉筷子都好污糟,全部有上一手留低嘅食物漬,睇文字都覺得嘔心啦,所以老婆忍唔住問個侍應:「喂,你哋有冇洗碗架?」
   
【辦公室日報|聶瞳】茶餐廳的童話故事

(圖:視覺中國)

侍應:「唔好意思呀,好難請人,新請呢個返兩日工又話唔做喇,得一個兼職洗,啲碗堆到山咁高,我即刻同你換過佢。」
    
老婆之後自言自語,話香港地好奇怪,萬幾蚊都請唔到人洗碗,好多人寧願失業都唔做,不過佢老公就粒聲都冇出,原來係諗到條財路。
    
老公:「我幫人洗碗咪得囉。」
    
老婆:「痴線,失業幾個月啫,唔使去洗碗呀?」真係今日的我打倒昨日的我,呀,唔係,佢老婆幾秒前先話人點解失業都唔肯做洗碗,幾秒後就推翻自己啱啱講完嘅嘢。
     
佢老公唔係想喺呢間茶餐廳應徵洗碗,而係要做晒呢條街,呢個區嘅洗碗。
     
【辦公室日報|聶瞳】茶餐廳的童話故事

(圖:視覺中國)

用咗一段時間做資料搜集,佢老公租咗嗰區一個地方做洗碗工場,投資咗一架Van仔,再沿住條街逐間茶餐廳拍門傾生意,成功接咗幾間茶記嘅外判洗碗生意。一日嚟收幾轉污糟碗碟,洗完又車返去,如是者呢壇生意Run咗幾年,亦都愈Run愈大,佢已經用賺返嚟嘅錢置業,生意上晒軌道。
    
呢個100%真人真事,唔係單單講緊勵志,當中蘊藏咗一個道理,就係有概念嘅同時,仲要落實執行。佢聰明在洞察到茶記用萬幾蚊都請唔到人洗碗,佢用一個承包價去接嚟做,喺市場上自然受歡迎,亦迅速被接受。呢個根本係供求問題,肯用腦兼肯踏出實際嘅一步,你都會有成功嘅一日。
     

編輯:Stacy

編輯推薦

【辦公室日報|聶瞳】如何面對假民主嘅老闆同上司

好難服侍?後來我每份工都遇到呢類人,爭在個病有幾嚴重?假民主到咩程度?而呢種情況通常都發生喺上司同老闆身上。

2018-06-08 12:16

【辦公室日報|聶瞳】當你遇到一個揀平唔揀靚嘅老細……

有時只係差一千幾百,老細都會試個平嘅,唔使解釋啦,慳得就慳吖嘛,佢哋會覺得全部求職者都有手有腳,咁既然一個萬五,一個萬四,梗係揀萬四啦。

2018-05-23 12:25

【辦公室日報|聶瞳】職場扯線公仔,做定唔做?

當時我的確係白紙一張,我都鍾意有人教我,但好抗拒做扯線公仔。

2018-05-23 09:22

熱門評論

已複製連結