橙新聞

辦公室日報x聶瞳

我哋呢幫打工仔,一生一世為錢幣做奴隸。

【辦公室日報|聶瞳】如何面對假民主嘅老闆同上司

文:聶瞳
  
以前喺報館做,有個總編出咗名假民主,因為體育版係有記者出去影相,影下球員,影下球迷反應,當個體記send啲相返嚟,呢個總編就會自然嚟料。
  
【辦公室日報|聶瞳】如何面對假民主嘅老闆同上司

(圖:視覺中國)

總編:「阿聶、阿恆、阿德、Alan、Eric、肥波,你哋過嚟吖。」
  
其實呢個時候,我哋幾個已經喺個位度「唉」咗一聲先行出嚟,跟住就會你眼望我眼唔出聲。
  
總編:「你哋睇下呢幾張相,揀邊張出街好啲?」
    
老實講,有鬼分別咩?啲球迷相幾乎一模一樣,只係左下角條友塊面側咗啲,右上角個球迷條頭髮飛起咗,不過揀啲冇分別嘅相唔係最難頂,最難頂係佢根本假民主。
   
我:「第3張吖,光啲。」
    
總編:「唔係喎,第1張個shot wild啲喎。」
    
阿德:「第2張個女球迷笑得靚啲。」
   
總編:「係咩,我覺得第1張佢露齒笑靚啲。」
  
Alan:「又好似係喎,第1張真係好啲。」
  
總編:「係哩,我都覺得第1張自然啲。」
  
唔好以為Alan係擦鞋仔呀,我哋夾埋架,因為大家試過無數次即刻附和佢,諗住可以嗱嗱聲返埋位做嘢,結果佢話我哋好求其,喺度敷衍佢。
   
其實我哋唔係冇試過認真回應,只係總編一早已經有答案,佢根本唔係問你意見,佢係要你認同佢,但又唔可以令佢覺得你hea,咁若然思考完唔認同呢?Sorry,你得一條路可以揀,就係要講中佢心入面個答案,真心buy佢個idea。
   
【辦公室日報|聶瞳】如何面對假民主嘅老闆同上司

資料圖

好難服侍?後來我每份工都遇到呢類人,爭在個病有幾嚴重?假民主到咩程度?而呢種情況通常都發生喺上司同老闆身上。
   
阿聶呀,你覺得邊個做法好啲呀?
   
阿聶呀,lunch食咩好呀?
   
阿聶呀,你覺得呢個客做唔做得過呀?
    
呢個時候就要交戲喇,先感受下佢內心個答案先,提一提其他意見,令佢覺得你有思考,最後要扮好buy佢個point,心悅誠服地講出佢內心嘅選擇,明架喇,人工包埋吖嘛。
  
責編:李玥展

編輯:Stacy

編輯推薦

【辦公室日報|聶瞳】當你遇到一個揀平唔揀靚嘅老細……

有時只係差一千幾百,老細都會試個平嘅,唔使解釋啦,慳得就慳吖嘛,佢哋會覺得全部求職者都有手有腳,咁既然一個萬五,一個萬四,梗係揀萬四啦。

2018-05-23 12:25

【辦公室日報|聶瞳】職場扯線公仔,做定唔做?

當時我的確係白紙一張,我都鍾意有人教我,但好抗拒做扯線公仔。

2018-05-23 09:22

【辦公室日報|聶瞳】我自小就接受特訓 將來應該係好老公

我覺得自己將來會係一個好老公,因為我會好有耐性去聽老婆講嘢,就算對方廚藝好差,只係煮得一手劣食,我都會欣然接受同埋食晒佢,事關我受過特訓,係由細到大受到聶媽媽嘅嚴格訓練。

2018-05-11 14:12

熱門評論

已複製連結