橙新聞

珍寶豬@診所低能奇觀

任職十幾年嘅診所助理,全科普通科做過,專科做過,連精神科都..……

【診所低能奇觀】我睇唔到醫生 你哋唔駛旨意走

文:珍寶豬
     
有日一位姨姨嚟到診所。佢一行埋嚟我已經同佢講:「我哋截咗症啦~三點半後再嚟呀。」
  
【診所低能奇觀】我睇唔到醫生 你哋唔駛旨意走

(圖:視覺中國)

佢:「我都未睇!」
我:「你今朝有冇嚟登記呀?」
佢:「冇呀!」
我:「咁你要晏晝三點半過嚟登記㗎啦~我哋已經截咗症啦,而家冇得登記㗎啦」
佢:「我都未睇!」
  
我哋要繼續LOOP到三點半嗎?仲有成兩個幾鐘喎…
  
我:「我知你未睇~你三點半後再嚟啦,我哋而家冇得睇㗎啦,冇得登記㗎啦」
佢指指坐喺度嘅人:「佢哋喺度做咩呀?」
佢哋?坐喺度睇你有幾樣衰衰囉~
  
我:「佢哋喺截症前登記咗,睇埋佢哋就收工㗎啦」
佢:「我又要好似佢哋咁!」
我:「我哋冇得登記㗎啦,你晏啲再嚟啦」
佢:「佢哋都有得睇啦,睇埋我唔得咩?」
個個都咁嘅,我哋個截症時間要嚟裝飾嗎?
我:「醫生仲有嘢要做嘅~你晏啲再過嚟啦」
  
佢行去大字型攔住門口大嗌:「總之唔睇埋我就邊個都冇得走!」
  
大佬,你咁癲我真係好歡喜呀,不過我哋有後門㗎~一係你試吓上半身攔正門,下半身攔後門呀。
  
【診所低能奇觀】我睇唔到醫生 你哋唔駛旨意走

(圖:視覺中國)

我:「我哋晏啲都仲有得睇,駛咩咁激動呢?」
佢手指指:「激動嗰個係你呀!我都嚟到啦!點解唔俾我睇呀?總之我冇得睇,你哋唔駛旨意走」
   
一位攞完藥嘅後生仔準備離開,姨姨繼續大字型:「我冇得睇,你都唔俾走!」
  
後生仔望住佢冇出聲,伸直左手按住隻門,成個畫面好恐怖,因為係一個壁咚畫面…不過姨姨係俾個格肋底壁咚咁。
  
門一推,阿姨失平衡大嗌:「呀呀呀~」
  
阿姨就咁跌咗出診所外,後生仔冷眼一望就跨過佢了。
  
佢即刻彈起身拍拍屁股追住個後生仔:「你咪走呀!你呀!咪走呀!」
  
睇嚟阿姨發覺後生仔比醫生更吸引~
    
  
責編:李玥展
  

編輯:Stacy

編輯推薦

【診所低能奇觀】男朋友的疑惑

佢終於大聲少少:「我係話我要唔要帶條女嚟同我睇醫生呀?」

2018-05-18 09:54

【診所低能奇觀】產後抑鬱好常見 要靠身邊人體諒幫助走出黑暗

有日一位姨姨嚟到~佢喺登記處前左望望右望望,一時面向我,一時又轉返身想走咁。我問佢:「係咪睇醫生呀姨姨?」佢欲言又止:「我…都係冇嘢啦~」我見佢個樣怪怪哋咁:「係咪有啲咩事呀?你可以同我講喎?」佢...

2018-05-10 10:39

熱門評論

已複製連結