橙新聞

辦公室日報x聶瞳

我哋呢幫打工仔,一生一世為錢幣做奴隸。

【辦公室日報|聶瞳】我自小就接受特訓 將來應該係好老公

文:聶瞳
我覺得自己將來會係一個好老公,因為我會好有耐性去聽老婆講嘢,就算對方廚藝好差,只係煮得一手劣食,我都會欣然接受同埋食晒佢,事關我受過特訓,係由細到大受到聶媽媽嘅嚴格訓練。

每次我喺屋企同細佬打Fifa,媽咪都唔會畀我哋兩兄弟完整咁打晒一場90分鐘嘅比賽,須知道喺遊戲機嘅世界入面,90分鐘其實得10分鐘左右咋,不過媽咪都係要同你講下「水喉要閂實」、「個煲嘅手柄壞咗」、「超市個收銀計錯佢錢」,而佢講嘢係要望住你講,要你畀反應,最初喺房外面講,跟住入房講,然後企喺你後面講,再坐你隔離講,直至你擺低遊戲機手製,將曼聯對車路士呢場大戰腰斬,專心一意咁聽。

所以呢,第日我老婆就算幾煩都好,我都有晒心理準備同經驗,要煩過我媽咪真係唔容易,未來老婆大人,我一定頂得住你啲碎碎唸。

媽咪喺煮食方面嘅創意同樣令人讚嘆不已,未熟嘅魚、好似擦紙膠咁嘅象拔蚌 (其實我唔肯定係咪象拔蚌)、明明唔記得落鹽但就話想健康啲嘅無味湯,仲有讚過佢一次就連續三個月晚晚煮嘅雞翼,我已經訓練有素,所以未來老婆就算有乜嘢驚天地泣鬼神嘅菜式都嚇我唔到。

多謝媽咪Train到我有咁強嘅接受能力,而最正嘅係,每次同媽咪講以上嘅事,我哋都會笑得好開心,老人家嚟講,佢係好講得笑,一家人最緊要都係呢種氣氛。

你個仔我已經唔細,仲幾老喇,學識咗主動問下你最近有咩喜怒哀樂,身體有冇邊度唔舒服,另外,想讚下你近一兩年啲餸真心好食咗,就好似我愈嚟愈識同你相處咁,全部都要時間去浸。雖然我唔想第日個老婆好似你咁長氣,成個緊張大師咁,但我知你係一個好老婆,好媽媽,處處都為屋企著想。

唔知幾時先畀到新抱茶你飲,不過我同細佬可以成日請你飲茶,咁多年嚟要你一個女人仔打理頭家,真係辛苦晒,所以我想同你講聲母親節快樂,盡力令你覺得每日都係母親節。

Facebook專頁:https://www.facebook.com/officedaily/
責編:李玥展

編輯:Dustin

編輯推薦

【辦公室日報|聶瞳】公司最重要嘅資產係員工 好員工先留得住啲客

好多老細以為自己公司最重要嘅資產係客人,呢個觀念係大錯特錯,其實一班員工先係基石,你對班下屬好,佢哋自然想幫你打工,幫你攞多啲生意,因為大家都想長做長有,點會想你衰?

2018-05-03 14:28

【辦公室日報|聶瞳】做邊一版嘅記者最易轉行?

大家知唔知邊一版嘅記者最易轉行同搵工?今期要揭曉喇,係副刊呀,你哋估唔估得中呢?

2018-04-26 12:15

【辦公室日報|聶瞳】做記者一定體會過的事

以前做記者嗰陣,啲親戚朋友一聽到我嘅職業就會講:「嘩,你好叻呀?」嗱嗱嗱,對於呢啲門面虛偽嘢千祈唔好沾沾自喜,因為好戲在後頭,通常第二句就會問:「你做咩版架?」

2018-04-17 15:46

熱門評論

已複製連結