橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】《全民星戰》出咗咩問題?

文:方以文
世界盃即將嚟到,拎到獨家播放權嘅新台唔敢怠慢,製作咗幾個同世界盃有關嘅節目,當中最矚目嘅暫時係《全民星戰》。呢個遊戲節目搵外援林敏驄同梁漢文做主持,再加上明星足球隊全力支援做嘉賓,但效果就真係差得緊要, 一個遊戲節目唔緊張唔好笑冇氣氛,到底出咗咩問題?

第一就係主持,林敏驄搞搞震係過癮,但要佢做主持帶領個節目真係有待改善。唔止一次講咸濕笑話亦都因為節目尺度而應該夾硬cut咗。呢個時代仲講咸濕嘢去令人笑唔知仲有冇用,但呢招只係可以喺電視節目當中擦邊球,就住就住,效果可以好差。最慘係兩個主持夾唔到,次次交流都係一句起兩句止,睇到好冇癮。

第二係啲遊戲出事。世界盃主題遊戲節目,32個遊戲最好所有都同足球有關,但的確係好難諗,呢個真係可以體諒。只不過部份遊戲唔應該放喺電視畫面呈現,冇乜動作搞到畫面好悶。仲要好多都唔係即時比拼,兩隊對決嘅藝員明星你玩完先到我玩,比賽較量感覺薄弱自然冇乜氣氛。

第三就係分組問題。首先係卡士強弱懸殊。第一個星期嘅嘉賓,有譚詠麟、劉美君、黃日華、羅家英、李子雄、羅鈞滿。除咗羅鈞滿之外,個個都份量十足,就算有啲同場肉搏嘅遊戲好似一齊搶錢咁,你叫ViuTV班藝人點夠膽同佢哋放膽玩?一個嘉賓就冇得好講啫,但有兩個嘉賓時就要諗吓將佢哋分開兩隊,平衡吓卡士氣勢先有得玩。另外,節目設計到每個藝員代表一個入圍世界盃嘅國家,搞到個個都係孤軍上陣,冇咗團隊合作,就自然冇咗「一命保全家」或者「一個累全家」嘅好睇好笑情況。有睇過個《SE7EN》、《衝三小》同留意ViuTV藝人嘅觀眾都知,佢哋當中有唔少人可以玩到好癲同好mean,安排一個個玩搞到零交流真係可惜。

第四就係藝人們唔係好識得做節目效果,或者呢個都係因為對手輩份太高所以唔夠膽玩得太癲,就連大聲啲吶喊都唔敢。睇咗幾集,得衝三小Dennis玩反杯嗰吓識得製造緊張氣氛好笑啲。

最後,本來應該吸引到觀眾去睇嘅獎金環節亦都出事。 兩隊人喺節目度比拼,原來只係會影響派幾多錢畀觀眾。觀眾只要等到周末睇吓製作團隊去邊個地區派錢,一集都冇睇過亦都可以去玩遊戲拎錢,咁就根本吸引唔到觀眾去睇個節目,同之前一樣係派錢嘅《籌旗》仲有好耐之前嘅《撳錢》比較,今次啲錢真係洗得好冤枉。

唔知《全民星戰》呢個節目係咪已經拍完,如果係的話,希望下次再努力。如果仲拍緊,起碼喺分組嗰度仲有孤身作戰方面可以立即作出更改。不過我要戴返個頭盔先,我做觀眾就咁講,唔使理執行上有咩難度就當然口行行,製作一個節目從來都唔係簡單事,尤其涉及咁多外援,應該都幾難搞。
責編:李玥展

編輯:Dustin

編輯推薦

【方以文 | 睇乜電視啊?】VR驅魔人:勇氣可嘉 貪心累事

ViuTV自從2017年10月播完由陳奕迅主演、莊梅岩編劇、陳志發監製執導嘅《短暫的婚姻》,事隔半年終於有自家製港劇播返,由王貽興同埋劉翁自編自導自演嘅《VR驅魔人》 打頭陣。20集劇由開播到完結,唔少傳媒都全力...

2018-04-23 16:17

【方以文 | 睇乜電視啊?】黃智雯靠反作用力爆上

今次《三個女人一個「因」》,終於畀黃智雯等到一套戲份重、角色難度大,能夠好好發揮嘅劇,當佢真係做得好嘅時候,觀眾支持佢嘅心理就一下子爆發出嚟,令到呢套因為將就星期日檔期由20集剪成18集嘅戲集,可以衝...

2018-04-13 09:47

【方以文 | 睇乜電視啊?】想王維基繼續做電視?冇乜可能

王維基搞新電視台係值得鼓勵支持,只係結果不似預期,冇乜必要潑人冷水踩多腳。

2018-04-03 11:13

熱門評論

已複製連結