橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】 日劇《大叔的愛》折射香港欠創作階梯

【方以文 | 睇乜電視啊?】 日劇《大叔的愛》折射香港欠創作階梯

《大叔的愛》劇照

文:方以文 
  
早排啲港劇唔係幾啱睇,所以開咗外地劇睇吓。當中睇得最過癮嘅,係近期火紅嘅日劇《大叔的愛》。男男戀愛題材,講33歲男社員被45歲男部長告白,再加上同社男後輩加入一齊爭仔,胡鬧好笑又不失溫馨(係呀係溫馨,真係估佢唔到),成為近期討論度極高嘅劇集,喺香港都有唔少觀眾捧場,一齊睇部長、春田田同阿牧之間點樣發展。有觀眾感慨香港做嚟做去都係爭產、律師、醫生、警匪卧底、宮廷劇,唔似日劇韓劇美劇咁多元,悶到喊。
  
要了解點解日本朝日電視台夠膽拍同播《大叔的愛》,就要先睇吓套劇嘅背景。呢套劇嘅播放時間係周六夜晚23:15 - 24:05,唔係黃金時段,可以放手一搏做啲「奇怪」嘅題材,冇咁大收視壓力之餘,搏到嘅話仲可以創造奇蹟。不過又唔好以為朝日電視台係毫無根據咁去搏一舖玩大佢喎,連續劇《大叔的愛》唔係橫空出世。喺2016年底,朝日電視台創作咗3集、每集一個故事單元嘅特別劇《年末奇怪愛情劇》喺深夜12點播出,而《大叔的愛》就係其中一集嘅主題。當時一樣由田中圭做春田田、吉田鋼太郎做大叔部長,而後輩阿牧就由落合扶樹飾演。呢套單元劇播出之後得到唔錯嘅回響,電視台就決定將佢拍成周末連續劇,即係依家大家睇到嘩嘩叫時又sweet嘅《大叔的愛》。
  
【方以文 | 睇乜電視啊?】 日劇《大叔的愛》折射香港欠創作階梯

【方以文 | 睇乜電視啊?】 日劇《大叔的愛》折射香港欠創作階梯

《大叔的愛》劇照

朝日電視台,冇出現綁手綁腳、固步自封食老本嘅態度,當然有絕大部分原因係日本冇一台獨大嘅情況。身為上巿公司嘅朝日電視台,要穩中求勝,最安全嘅做法就係好似以上所講嘅咁:新穎題材放喺非黃金時間去試。得嘅話就拍長啲,唔得嘅話都可以賺到「創意、肯搏、有活力」呢啲正面評價。反觀香港,無可否認現時投放最多資源去拍劇嘅仍然係大台無綫,但畀人話係最悶嘅都係無綫。大台追求穩打穩紥,唔可以得失固有觀眾,漸漸做成惡性循環,觀眾群愈收愈細,劇集題材亦愈來愈單一,互相影響無間循環。而現實係雖然一台獨大嘅情況依舊,但所謂嘅「大」只係相對其他電視台嚟講,本身成個電視業嘅受眾係減少緊。香港電視業要有得繼續玩、吸引多啲人去追劇,新穎嘅題材好重要,就算唔新都唔可以成日重複,要多元化啲。
  
我最初仲以為大台會用Big Big Channel夾埋J2兩個平台去做第二階梯,無論係演員同節目方向各方面都會喺呢兩個平台度試,試完得嘅話再上翡翠台,但眼見J2啲節目只係換咗班後生仔做膽,節目題材都冇乜新鮮同突破。Big Big Channel都一樣,啲網劇題材同翡翠台其實係大同小異。失去咗實驗性之後,除咗藝員直播之外同myTV SUPER可以話係冇分別。依家仲全力去搞網購,已經冇乜消息話會再拍網劇。ViuTV呢?經過一輪衝鋒陷陣之後,節目大膽度降低,有網民甚至覺得播緊嘅大型遊戲節目《全民星戰》有大台嘅影子,創新活潑嘅感覺大不如前。
    
【方以文 | 睇乜電視啊?】 日劇《大叔的愛》折射香港欠創作階梯

圖:ViuTV全民星戰

其實新台開台之時都有個「實驗電視」系列,彈出咗我覺得好正嘅無聊組合「衝三小」,叫係有成績,點解唔繼續做落去?呢個「開放平台」嘅玩法,講得難聽啲係電視台着數晒,做得好電視台就有收視,做得唔好又可以將啲責任全部推落去啲「實驗人士」身上,百利而無一害。對於製作水平普遍低過無綫嘅ViuTV嚟講,創新好重要,如果係同類節目,我就會揀睇無綫,製作成熟得多。
    
講到尾,創意工業嘛,創意對於任何一間電視台都係好重要。無綫同埋ViuTV,甚至係買咗好多香港電視製作嘅奇妙電視,仲有借ott復活嘅亞視,理應好好諗吓,盡快開返試新嘢嘅平台,先係長遠之策。 
  
責編:李玥展

編輯:Stacy

編輯推薦

【方以文 | 睇乜電視啊?】《全民星戰》出咗咩問題?

《全民星戰》呢個遊戲節目搵外援林敏驄同梁漢文做主持,再加上明星足球隊全力支援做嘉賓,但效果就真係差得緊要, 一個遊戲節目唔緊張唔好笑冇氣氛,到底出咗咩問題?

2018-05-10 10:17

【方以文 | 睇乜電視啊?】VR驅魔人:勇氣可嘉 貪心累事

ViuTV自從2017年10月播完由陳奕迅主演、莊梅岩編劇、陳志發監製執導嘅《短暫的婚姻》,事隔半年終於有自家製港劇播返,由王貽興同埋劉翁自編自導自演嘅《VR驅魔人》 打頭陣。20集劇由開播到完結,唔少傳媒都全力...

2018-04-23 16:17

【方以文 | 睇乜電視啊?】黃智雯靠反作用力爆上

今次《三個女人一個「因」》,終於畀黃智雯等到一套戲份重、角色難度大,能夠好好發揮嘅劇,當佢真係做得好嘅時候,觀眾支持佢嘅心理就一下子爆發出嚟,令到呢套因為將就星期日檔期由20集剪成18集嘅戲集,可以衝...

2018-04-13 09:47

熱門評論

已複製連結