橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】VR驅魔人:勇氣可嘉 貪心累事

文:方以文
      
ViuTV自從2017年10月播完由陳奕迅主演、莊梅岩編劇、陳志發監製執導嘅《短暫的婚姻》,事隔半年終於有自家製港劇播返,由王貽興同埋劉翁自編自導自演嘅《VR驅魔人》 打頭陣。20集劇由開播到完結,唔少傳媒都全力催谷,希望可以對大台做成衝擊。呢個係基於對王貽興同埋劉翁,仲有一大班串星嘅期待,觀眾對於呢套劇嘅期望自然會提高。
   
【方以文 | 睇乜電視啊?】VR驅魔人:勇氣可嘉 貪心累事
不過咁樣對於主力寫作同主持嘅王貽興,仲有主力廣告同攝影嘅劉翁嚟講係致命傷。因為好多人都唔記得咗佢哋係第一次拍劇,而且冇受過相關訓練,完全係天才波。唔係為佢哋辯護,正如我喺自己個page嘅每日觀後感都有碗話碗,有碟話碟,只係對於新手導演嚟講,呢個作品我就收貨喇。
      
選角方面,劇集未播時已經知道有20集但係有咁多星參與,我就怕呢套劇好似《豪門夜宴》咁,啲星只係用嚟點綴堆砌。王貽興喺初期接受訪問時已經斬釘截鐵話啲星一定有作用,而事實就係呢啲星唔單止唔係點綴,仲要成為套劇嘅救命草。喺選角呢方面,佢哋兩個可以話係出色,差唔多個個角色都恰如其份,有部分演員好似係吳浩康、林耀聲、黃溢豪、劉皓嵐(劉小華),更加令人喜出望外。喺支離破碎嘅劇情當中,唔只一次因為演員嘅演技,先至吸引到我睇落去。
    
【方以文 | 睇乜電視啊?】VR驅魔人:勇氣可嘉 貪心累事

劇本取材方面太貪心。20集嘅內容,有十個題材單元,部分只係一集去處理,支離破碎嘅主要原因在此。有人話如果畀多啲時間佢會好啲,咁呢個就一定。但我都係堅持我嘅睇法:一早知道套劇係20集,每集連埋廣告係30分鐘,咁就要喺呢個框架度做到最好。你做學生時做作者功課,都冇得同老師講作文限住800字所以寫唔到我想寫嘅嘢。從來電視作品最大嘅敵人就係播放時間,畀幾多時間你,你就要喺限制裡面做到最好,將題材剪輯處理係好重要,今次《VR驅魔人》喺呢個方面係最差,亦都係致命傷。
       
另外,按照主理人所講,呢套劇係「瘋狂悲劇」,想「愈瘋狂愈表現出香港嘅悲哀」。瘋狂係有嘅,集中喺王貽興同劉翁身上,但就對於劇情冇乜幫助,而且多數都係喺致敬情節。有睇佢哋兩個主持嘅《書到用時》都應該預咗啲笑料係低俗屎尿屁,啱唔啱就係個人品味取向,見仁見智,但就一定做唔到「表現出香嘅悲哀」。
    
【方以文 | 睇乜電視啊?】VR驅魔人:勇氣可嘉 貪心累事
但話說回頭,要兩個三十幾歲嘅人,跳出comfort zone,做一啲自己未做過嘅嘢,仲要喺眾目睽睽之下做出嚟,而且唔係做王貽興專長嘅愛情嘢,呢份勇氣係值得尊敬嘅。只係第一次做就去挑戰自編自導自演,唔係個個做到。
   
強如新任影帝古天樂,都話暫時只要一日做演員就唔會做導演,因為導演嘅工作真係要花好多精力。有人問王、劉兩位點解要自己做返主角,佢哋嘅答案係冇budget搵唔到人去做。呢個答案我估係真嘅,因為ViuTV出咗名budget少,今次佢哋兩個唔收自己份人工之餘仲要嘔突。
    
【方以文 | 睇乜電視啊?】VR驅魔人:勇氣可嘉 貪心累事
但諗諗吓,如果將單元減少,除咗可以解決時間問題,仲可以慳返啲巨星們嘅演出費(佢哋係收順啲但都要收錢),咁就應該褪到啲錢出嚟,請個新啲又有演技嘅人去做VR二人組。同劇出現嘅岑珈其已經係其中一個人選,另外仲有黃定謙、柯煒林都係好嘅選擇。依家問題係觀眾對於王貽興同埋劉翁嘅固有形象太深,佢哋今次嘅演出如果係一個「白紙般」嘅演員去做,我諗大家都會收貨。但好可惜兩位唔係白紙,觀眾對佢哋有一定要求無何避免
   
喺《VR驅魔人》播完之際,王貽興同劉翁就嚟拍完大馬資金投資嘅血腥電視劇《陽關道》,都係自編自導自演,希望佢哋新一個作品有明顯嘅進步。我係支持嘅,因為全力投入又有機會嘅人真係唔多。善意批評,希望觀眾同埋製作方都可以互相砥礪成長。
  
責編:李玥展

編輯:Stacy

編輯推薦

【方以文 | 睇乜電視啊?】黃智雯靠反作用力爆上

今次《三個女人一個「因」》,終於畀黃智雯等到一套戲份重、角色難度大,能夠好好發揮嘅劇,當佢真係做得好嘅時候,觀眾支持佢嘅心理就一下子爆發出嚟,令到呢套因為將就星期日檔期由20集剪成18集嘅戲集,可以衝...

2018-04-13 09:47

【方以文 | 睇乜電視啊?】想王維基繼續做電視?冇乜可能

王維基搞新電視台係值得鼓勵支持,只係結果不似預期,冇乜必要潑人冷水踩多腳。

2018-04-03 11:13

【方以文 | 睇乜電視啊?】潘嘉德離巢 無綫演員更替或更慢

《三個女人一個「因」》喺周日檔期都可以拎到超過18點嘅7日跨平台累積收視,而且氣勢愈來愈好,有望衝破20點,實在係好劇有好報。

2018-03-22 14:42

熱門評論

已複製連結