橙新聞

辦公室日報x聶瞳

我哋呢幫打工仔,一生一世為錢幣做奴隸。

【辦公室日報|聶瞳】做記者一定體會過的事

文:辦公室日報x聶瞳
  
以前做記者嗰陣,啲親戚朋友一聽到我嘅職業就會講:「嘩,你好叻呀?」嗱嗱嗱,對於呢啲門面虛偽嘢千祈唔好沾沾自喜,因為好戲在後頭,通常第二句就會問:「你做咩版架?」
    
綜合我自己同埋其他行家嘅經驗,做唔同版會得出以下不同反應。
   
1.港聞版
    
【辦公室日報|聶瞳】做記者一定體會過的事

圖:AFP

親戚朋友:好勁喎,有冇試過去啲兇案現場影死屍?上次嗰單殺人案呢,你係咪入咗去旁聽呀?啲律師係咪好似電視嗰啲咁架?個殺人犯係咩樣架?
      
港聞版行家點諗:首先做港聞係有分文字記者同埋攝影記者,另外去聽審就係法庭版嘅事,而且通常法庭都係朝早開審,好多案件係同一時間處理,一個記者係聽唔晒,一定要同行家互相駁料,否則識分身都做唔掂,呢啲認知好似係基本嘢,但要講到外人明白又好似好難。
     
2.娛樂版
   
【辦公室日報|聶瞳】做記者一定體會過的事

圖:視覺中國

親戚朋友:狗仔隊呀?日灑雨淋慘過做地盤喎,仲要畀啲明星鬧......呀係呢,你同啲明星應該好熟啦,有冇黃子華飛呀?你用記者證帶埋我入後台得唔得呀?
   
娛樂版行家點諗:你又要踩我,又要喺我身上攞著數,想點呀?
   
3.財經版 & 馬經版 
   
喺親戚朋友眼中,做財經同馬經係一樣架咋,因為佢哋得一句對白:有冇貼士呀?係咪一定掂架?
    
財經版 & 馬經版行家點諗:應該冇乜得點諗,慣晒架喇,唔畀話你冇料到,做記者都收唔到料,畀咗料之後如果賺錢唔會多謝你,輸錢就唱你十世。
    
4.體育版
    
親戚朋友:同財經、馬經一樣,問貼士,再彈下報紙啲推介成日唔中,最誇張係問你係咪一早知賽果。
    
體育版行家點諗:又係唔知點解釋體育版有分本地版同埋波經版,但都係嗰句,外人係唔明,另外好想大叫一聲「我打份工架咋,如果一早知賽果,我匿埋喺屋企賭波啦,使鬼返工呀!」
    
5.風月版
    
首先而家已經冇乜風月版,因為好多報紙要打入校園,近年逐漸洗底令到形象入屋,不過當年仍然有好多親戚朋友咁講:你就好啦!成日可以免費去夜總會,點解啲小姐肯畀你影相嘅?
  
已絕種嘅風月版行家當年點諗:死蠢!全部鱔稿嚟架,日日去夜總會就腎虧死咗啦,啲相係客提供架,你唔係諗住我真係會拎支長鏡落夜總會影相呀?我每日返工就喺個位度砌相砌稿,宅過隱青呀!
  
【辦公室日報|聶瞳】做記者一定體會過的事

圖:視覺中國

而無論你係做咩版都好,梗會有啲親戚朋友想利用你嘅記者身份幫佢做私人嘢,攞戲飛、攞演唱會飛、攞波飛、攞書展入場劵好碎料,仲有啲係買嘢畀人呃,或者同人嘈交鬥氣,會叫你拍硬擋寫單嘢出嚟唱衰人,幫佢出啖氣,做過記者嘅人一定試過。
   
冇獎問答遊戲,知唔知報紙或媒體咁多版塊當中,邊一版嘅記者最易轉行同搵工?下期專欄揭曉。
  

編輯:Stacy

編輯推薦

【辦公室日報|聶瞳】刷存在感的HR最可怕

呢位人事部經理為咗上位,用咗最低等,亦係最損人不利己嘅方法,就係踩低別人,不理其他員工嘅死活,一切一切都係為咗鞏固自己嘅地位。

2018-04-11 15:29

【夢專訪】獵頭KOL:喺呢一行想發達 埋沒良心就得了

聶瞳諧音「獵頭」,以職場險境和獵頭視角為主題的page,聶生認第二,全香港應該沒人敢認第一:短短一年時間,「辦公室日報」由零開始,到現在近8萬like,廣告、宣傳job接到手軟,最近還出了自己的第一本書,繼續...

2018-04-12 11:39

【匿名專訪】10年資深HR:見工奇葩多,炒人心酸多

所謂「HR」,就是公司裡你最怕得罪又最想掐死的人。好多人都認為,這班人平時沒事做,利用老闆在同事面前狐假虎威,關鍵時刻還處處刁難你。「廢嘅」、「冇料扮四條」、「寸嘴」……

2017-06-28 08:57

熱門評論

已複製連結