橙新聞

HR小薯蓉

存活於邪惡軸心HR,由一粒薯仔做到變薯蓉。放工同你嘆住薯蓉講東講西,平衡下繁忙心理。

【收工嘆薯蓉】終生作文題:我的志願

文:HR小薯蓉
   
相信每個人喺細細個做小學雞嘅時候,都畀老師「逼」過你作一條作文題目叫「我的志願」。對於一個幾歲大嘅小學雞嚟講,呢條題目其實好深奧。喺佢嘅世界,一直都只係諗到「幾時有嘢食?」「幾時有電視睇?」「老豆老母幾時會帶我去迪迪尼?」全部都係好短視嘅願望。你問佢「我的志願」呢啲咁長遠嘅嘢,其實佢連呢個世界有咩選擇都未知。
   
【收工嘆薯蓉】終生作文題:我的志願

圖:視覺中國

為咗應付呢條唔知點答嘅作文題目,小學雞唯有向經驗豐富嘅爸爸媽媽請教。而爸爸媽媽好理所當然係望子成龍,建議嘅答案都係醫生啦、律師啦、太空人啦、科學家啦,呢啲行到爆嘅答案,小學雞連呢啲職業其實要做咩可能都未知。於是,佢就根據爸爸媽媽嘅意見完成咗呢篇唔知為咩嘅文章。
  
喺之後嘅數十年,小學雞變成大學雞,學校冇再叫佢作「我的志願」,讀嘅都係數學、理論、歷史呢啲知識層面嘅知識。當年呀爸呀媽幫佢作嘅「我的志願」,佢自己、甚至係幫佢作文嘅呀爸呀媽,都將個志願忘記得一乾二淨。
  
【收工嘆薯蓉】終生作文題:我的志願

圖:資料圖

到咗有一日,大學雞終於讀完書要畢業了。佢出去搵嘢做,第一次去見工畀人問嘅第一條問題竟然就係同「我的志願」好相似嘅問題:「你到底想做啲咩?想搵份點樣嘅工作。」佢聽到之後啞咗,因為佢呢幾十年嚟都冇再諗過呢個問題。入大學揀科嘅時候,因為為咗入到大學,讀咩科對佢嚟講都冇所謂,所以根本冇諗過自己鍾唔鍾意、或者將來可以做啲咩。就喺經歷咗人生學習嘅黃金數十年之後,佢先發現自己唔知自己想做啲乜。
   
【收工嘆薯蓉】終生作文題:我的志願

圖:視覺中國

細個嘅時候作「我的志願」,呢條作文題目雖然看似好簡單好普通,而且答案未必需要當真。不過呢條題目本身嘅意義唔在於個答案,而係在於畀一個契機小朋友開始思考自己嘅人生。更加重要嘅係,呢條問題唔止適用於小學雞嘅階段,喺整個人生無時無刻都需要思考。
  
請好好看待「我的志願」呢條題目,呢條係一條終生思考題。
   
小薯蓉Facebook專頁:https://www.facebook.com/hrpotato/
責編:李玥展

編輯:Stacy

編輯推薦

【收工嘆薯蓉】三大貼士 話你知旅行點先可以有艷遇?

其實旅行艷遇呢樣嘢唔係好似睇戲咁容易發生,就算發生,係好事定壞事都冇人知。雖然我未必可以教你點樣有艷遇,但可以話你知點樣可以識到多啲朋友,因為識朋友永遠係打開關係嘅第一步。

2018-04-12 12:16

【收工嘆薯蓉】如果老細難頂 不妨睇多幾套恐怖片…

如果你返工壓力大,就更加要睇多幾套恐怖片,或者買多幾套DVD喺屋企旁身,準備畀老細嚇完,返屋企再嚇一嚇自己減壓。

2018-03-08 12:01

【收工嘆薯蓉】4個單身都幸福嘅理由

人人都拍拖,唔通人人都想拍拖咩?有啲朋友真係好享受單身嘅生活,見人放閃都唔會酸溜溜。拍拖當然有拍拖嘅好,但千祈唔好介意自己單身,其實單身都有好多值得好好享受嘅地方。

2018-03-01 09:41

熱門評論

已複製連結