橙新聞

辦公室日報x聶瞳

我哋呢幫打工仔,一生一世為錢幣做奴隸。

【辦公室日報|聶瞳】刷存在感的HR最可怕

      
文:辦公室日報x聶瞳
    
以前做HR嗰陣,我對上仲有一個上司,亦即係人事部經理,佢份人好大喜功,最鍾意喺老闆面前表現自己。基本上公司每一次炒人,佢都係幕後黑手,目的係要營造幫老闆慳錢嘅形象,藉此提升自己嘅價值,專長係無事生非,刷存在感。
   
【辦公室日報|聶瞳】刷存在感的HR最可怕

(圖:視覺中國)

坦白講,一個人要上位有好多方法,可以默默耕耘、可以擦鞋、可以周圍打關係,偏偏呢位人事部經理用咗最低等,亦係最損人不利己嘅方法,就係踩低別人,不理其他員工嘅死活,一切一切都係為咗鞏固自己嘅地位。
    
上得山多終遇虎,有一次刷存在感終於刷出禍。事緣公司喺深圳同埋廣州分別有廠,而通常啲廠都係偏離市中心,換言之食飯唔會好似返Office咁方便,公司會包埋工廠工人嘅伙食,而呢位人事部經理平均一個月會上一兩次工廠處理文件,某次佢返落嚟之後,竟然同老闆講工人嘅伙食太好,公司唔需要花咁多錢喺呢度,建議老闆換過另一間伙食承包商。
    
首先我想講,原本工人啲伙食已經唔係特別好,承包商嘅費用大約係每個人17蚊人仔一餐,而人事部經理走去打小報告之後,換咗另一個承包商,工人伙食成本降到去每個人8蚊人仔一餐,跟住發生咩事?梗係工人罷工兼投訴啦!新嘅伙食係連一嚿肉都冇,據了解真係求其烚熟啲菜連水咁上,廣州同深圳方面嘅工人阿頭都形容係豬餿。
    
後來人事部經理如常去深圳工廠出巡,臨走嗰陣畀班工人圍堵佢架車,拍打車門要拉佢出嚟打,呢單嘢搞到要報公安,雖然後來平息咗,但成班工人都講明,再見到呢位人事部經理上嚟會見鑊打鑊,正所謂猛虎不及地頭蟲,莫講話打啦,溶咗你都仲得,何況呢隻根本唔係猛虎。
     
我當時只係小角色,但都睇得出老闆根本唔在乎,你幫佢慳錢,梗係求之不得啦!仲有個人事部經理做醜人,老闆最鍾意呢啲爛頭卒同傀儡,而嗰位人事部經理自此之後就再冇上過深圳同廣州工廠,淨係叫國內同事Email啲文件嚟香港處理,做經理做到成隻過街老鼠咁,真係替佢難過。
     
國內工人嘅薪酬普遍唔高,日日困喺間廠同你做埋啲刻板工作,你連一餐好啲嘅飯都唔畀人食,畀人圍毆都唔抵可憐。
    
 
責編:李玥展

編輯:Stacy

編輯推薦

【匿名專訪】10年資深HR:見工奇葩多,炒人心酸多

所謂「HR」,就是公司裡你最怕得罪又最想掐死的人。好多人都認為,這班人平時沒事做,利用老闆在同事面前狐假虎威,關鍵時刻還處處刁難你。「廢嘅」、「冇料扮四條」、「寸嘴」……

2017-06-28 08:57

25歲單身不配做設計師?求職者細數奇葩面試經

公司負責招聘的HR總抱怨面試時最怕遇到不靠譜應聘者,事實上,求職者遭遇的奇葩面試潛規則也不少。據內地《天府早報》報道,某遊戲公司設計師趙宇曾經在面試時就曾經因為「單身狗」的原因而被淘汰。

2017-12-05 16:24

熱門評論

已複製連結