橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】想王維基繼續做電視?冇乜可能

  
文:方以文
    
3月28日,王維基公布唔再繼續申請免費電視牌照,連同流動電視牌照一齊唔玩。2012年成立嘅香港電視,到2018年為止,同一眾歡迎新電視台加入戰團嘅觀眾,一齊發完一場美夢。
      
【方以文 | 睇乜電視啊?】想王維基繼續做電視?冇乜可能

(圖:星島)

做電視迷,最想王維基玩落去。唔做免費電視台,咁可唔可以用第二啲方法去參與電視製作呢?先講好多人都想佢做嘅OTT平台。HKTV網上平台其實一直都喺度,除咗不斷loop住播放自製電視劇之外,亦都可以點播(王維基宣布唔玩之後,我去佢哋網站已經click唔到啲電視劇出嚟睇),曾經造到個聲勢出嚟但無以為繼。皆因去佢個網、點播嘅誘因動力要好大。
  
咁Netflix又得嘅?因為佢冇免費對手。出品出色當然係重要嘅原因,但如果香港有個台係免費播美劇,就算出品係差一級,都會搶走唔少Netfilx嘅客人。點解?因為人係懶嘅,情況就正如「無綫財經資訊台」同「無綫新聞台」一樣,唔使做到好出色,但就係有人睇,因為佢免費,仲因為人嘅惰性。明明你都裝咗有線、nowTV,但就會因為要click多個掣而少咗轉台嘅動力。
       
【方以文 | 睇乜電視啊?】想王維基繼續做電視?冇乜可能

(圖:亞洲電視@Facebook)

睇返無綫自己出盡力搞嘅OTT平台,myTV SUPER係靠住免費台嘅威力,食咗班本身都睇無綫但冇得坐定定睇電視嘅人。BigBigChannel亦都靠住免費台播放嘅劇集聯同藝員惡搞先至有力吸人,自家製作好似《12瞞徒》、《麻雀王大賽》,其他上妝落妝打機節目,吸引力都唔夠惡搞《溏心3》夏雨潑唐文龍奶茶收睇率、討論度咁高。另外一個實實在在嘅例子係以OTT翻生嘅亞視,有免費電視時代班死忠粉絲,都唔能夠將佢哋移植過去OTT,最大聲威嘅陳志雲《百萬富翁》,我估冇乜人知道播到第幾集……
      
OTT唔得,咁做content provider又得唔得先?王維基將《來生不做香港人》播放權賣咗畀奇妙電視,令到唔少觀眾有呢個諗法,覺得會work。有傳聞話除咗奇妙之外,冇人肯買維基出品嘅電視劇。呢個情況當然只反映HKTV喺網絡播過嘅作品啦,咁如果係全新作品呢?王維基會唔會承接外判製作?答案我認為係否定嘅,因為王維基呢個生意人要計計數。
  
【方以文 | 睇乜電視啊?】想王維基繼續做電視?冇乜可能

(圖:星島)

外判嘅製作機會係有嘅,以ViuTV會同人傾電視劇集製作,港台、TVB都有外判計劃,但巿場上已經有好多人做緊,而且有好多時都係不計成本做到盡,點解?因為佢哋有免費平台去播。依家王維基冇咗個平台,製作團隊早已各散東西,本身唔係影電製作出身嘅王維基要做,就要召回舊部層層架構去拍套劇,拍出嚟賺錢機會微乎其微,為啖氣,生意人絕對唔肯。
  
唯一嘅突破點,係將作品賣畀香港之餘,亦都賣去其他想睇香港出品電視節目嘅地區,好似係大陸、大馬、歐美華人社區咁。不過睇返港視剛公布嘅業績,喺2017年虧損收窄,但仍然係蝕緊錢,要開另一條戰線,唔好計資金,時間都係成本嚟。呢一步做唔做,就真係好睇王維基有幾鍾意電視製作。
      
【方以文 | 睇乜電視啊?】想王維基繼續做電視?冇乜可能

(圖:ViuTV@Facebook)

依家王維基繼續可以做又有關於影視製作嘅,就淨係得返喺將軍澳工業邨嘅廠房。之前王維基講過,話如果有後生仔想用佢啲機器同廠房嘅話,可以搵佢,傾得埋嘅可以免費用。但如果要收錢呢?我只係知道ViuTV搞大型節目,好似《美選D.n.A》、《Goodnight Show全民星戰》咁,需要個大廠拍攝時,佢哋係去租邵氏影城嘅錄影廠。
      
有人笑王維基冇咁多錢就唔好搞電視台,如果當初好順利咁拎到免費牌照,會唔會有力支撐落去,我哋永遠唔會知道。現實就係空有製作但係冇渠道回本,拖足6年。任你有千軍萬馬、富可敵國,理智啲嘅人都會同王維基做相同嘅決定:斬纜。王維基搞新電視台係值得鼓勵支持,只係結果不似預期,冇乜必要潑人冷水踩多腳。
  
方以文 睇電視喇喂Facebook:https://www.facebook.com/fongeman/
責編:李玥展

編輯:Stacy

編輯推薦

【夢醒時份】王維基電視夢完!港視不繼續申請免費電視牌

一度雄心想進軍免費電視台的「魔童」王維基,將面對現實。香港電視(1137)今日宣布,將不會繼續本地免費電視節目服務牌照的申請,及其於2014年4月11日向通訊事務管理局所提交的申請將予以撤回。

2018-03-27 13:02

【了結8年夢不甘心】王維基:若獲發牌將創最輝煌的電視史

香港電視主席王維基,日前正式宣布放棄發展電視業務,了結長達8年的電視牌照等待。王維基今日表示,港視當年若獲得發牌,過去數年會是香港電視史上最輝煌的日子,當時很多人都有期望。

2018-03-29 11:20

【方以文 | 睇乜電視啊?】《三個女人一個「因」》改錯名?

有啲觀眾仲覺得《三個女人一個「因」》改錯名而趕客,破壞咗呢個被視為黃智雯問鼎視后嘅作品,原因係個名太過複雜,話唔係好明白套劇想講乜。

2018-03-06 15:10

熱門評論

已複製連結