橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】潘嘉德離巢 無綫演員更替或更慢

文:方以文

《三個女人一個「因」》喺周日檔期都可以拎到超過18點嘅7日跨平台累積收視,而且氣勢愈來愈好,有望衝破20點,實在係好劇有好報。不過與此同時,呢套劇嘅監製潘嘉德就喺IG宣布離開工作咗超過40年嘅無綫電視,令到一班電視觀眾包括我好震驚。

黃淑儀、黃智雯、監製潘嘉德(圖源:潘嘉德Instagram)

或者你會覺得「震驚」會唔會誇張咗,因為德哥都已屆退休年齡,佢唔做都好正常啫(其實佢唔係唔做呀,只係轉個環境)。但我依然係覺得震驚嘅,因為德哥係好多套金牌劇集嘅監製,包括咗《刑事偵緝檔案》系列、《鑑證實錄》系列、《On Call 36小時》系列,仲有《衝上雲霄I》。

(圖源:劇集宣傳海報)

(圖源:《衝上雲霄I》劇照)

雖然近年《超能老豆》同《流氓皇帝》偶有失手,但都無損佢金牌監製嘅形象。對於觀眾嚟講,無咗個有經驗嘅監製去製作劇集係最明顯嘅損失,但其實德哥對於大台演員嘅交替都係好重要,因為佢肯用新人,而且大多時都成功發掘到演員嘅特點,令到新演員可以借力上位。

喺2003年播出嘅《衝上雲霄I》,搵咗當時仲讀緊藝訓班嘅胡定欣做男主角之一馬德鐘嘅妹妹Coco。定欣就靠呢次喺觀眾心中留下印象,之後好快就係2004年嘅《大唐雙龍傳》度做深情邪角婠婠。

左為飾演Coco的胡定欣(圖源:《衝上雲霄I》截圖)

一步步走上視后之路唔可以話全靠德哥,但如果無德哥,都唔知要捱多幾多年先做到成績出嚟。播緊嘅《三個女人一個「因」》,德哥就搵咗2013年喺藝訓班畢業嘅陳俊堅,飾演仰慕黃淑儀嘅粉絲,兩場戲畀足機會佢,又發揮到,唔知可唔可以再創奇蹟,令陳俊堅快啲上到位。

陳俊堅(圖源:劇集截圖)

當然唔可以唔提佢開到聲話「無令佢失望過」嘅黃智雯,2007年參加港姐、2008年藝訓班畢業,2009年就喺《巴不得爸爸…》當中以「四眼妹」造型跑出,2010年再喺《搜下留情》繼續畀德哥打造成「四眼妹」連戲。雖然令到黃智雯深入民心嘅《缺宅男女》關二嫂係由張乾文監製,但最先搵黃智雯擔任主要角色嘅,仍然係德哥嘅《On Call 36小時》,做楊怡嘅細妹洪美雪。

(圖源:黃智雯Facebook專頁)

唔好以為喺藝訓班出身嘅德哥特別照顧「同門」師弟妹,其他「派系」就唔理。其實佢一樣畀好多機會新人,包括咗岑麗香,佢「香香公主」呢個名都係因為演出咗德哥監製嘅《巴不得媽媽…》而來。仲未出播嘅《婚姻合伙人》(前稱《抱佣情人》),就用楊明同高海寧做男女主角。暫時喺無綫最後一套劇《好日子》亦都畀咗機會2017年華姐冠軍余思霆演出。

《婚姻合伙人》開鏡(圖源:TVB官方微博)

講咁多例子,都係想話畀大家知,德哥喺培育人材方面都值得我哋留意。監製有返咁上下地位,唔使爭上位,先可以放膽試吓唔同嘅演員、題材。不過觀乎其他有地位嘅監製,都唔似得德哥咁願意嘗試。所以唔少觀眾嘅對德哥離開TVB係覺得可惜嘅,無錯,我哋係有機會喺其他平台繼續見到佢嘅作品,但佢對無綫內部嘅作用就消失咗。

所以德哥你唔好驚訝,點解觀眾對於你離開無綫咁大反應呀,你做咁多好嘢我哋係知道嘅,多謝你。

責任編輯:李玥展

編輯:Wing

編輯推薦

【方以文 | 睇乜電視啊?】《三個女人一個「因」》改錯名?

有啲觀眾仲覺得《三個女人一個「因」》改錯名而趕客,破壞咗呢個被視為黃智雯問鼎視后嘅作品,原因係個名太過複雜,話唔係好明白套劇想講乜。

2018-03-06 15:10

【方以文 | 睇乜電視啊?】應節劇集新玩法

一年伊始,祝大家新年行大運。大時大節要講意頭,新正頭開住部電視機,都希望可以睇到聽到啲開心吉祥嘢。今個農曆年,大台、新台、奇台都有製作賀歲宣傳片,無綫就喺一廠出面舞獅賀新年,奇妙電視就舞獅遊港九,...

2018-02-22 11:42

【方以文 | 睇乜電視啊?】平安谷之20詛咒

《平安谷之詭谷傳說》緊接台慶劇播出,屬於傳流收視「死期」,不過收視同埋口碑喺頭半套劇都有好反應,非常有氣勢,新計法7日跨平台總收視衝到去26點(《溏心風暴3》大結局喺新計法之下都係得30.8點),不過去到下...

2018-02-08 11:48

熱門評論

已複製連結