橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】《三個女人一個「因」》改錯名?

文:方以文

唔少觀眾都替黃智雯唔抵,因為繼《雜警奇兵》之後,又係用佢擔正嘅《三個女人一個「因」》做周日炮灰劇。除咗個檔期之外,有啲觀眾仲覺得《三個女人一個「因」》改錯名而趕客,破壞咗呢個被視為黃智雯問鼎視后嘅作品,原因係個名太過複雜,話唔係好明白套劇想講乜。


(圖源:TVB)


劇名表達人格分裂

先講吓個劇名係點解。呢套劇嘅主角方以因(黃智雯飾)係人格分裂病患,總共有三個人格出現,「三個女人」就係講呢三個人格。而「一個因」呢?就係話三個女人嘅人格出現喺主角「方以因」身上,仲食埋個「因」字同「人」字一樣嘅音,進一步表示三個人格出現喺同一個人身上。

(圖源:TVB)

好複雜?我唔覺得喎,仲覺得幾畀心機去改呢個名。睇返大台劇名,十個有八個都求其了事。「乜乜狙擊」、「乜乜風暴」、「乜乜追兇」,聽到都覺得討厭。

(圖源:TVB)

最大鑊係呢啲名對於觀眾嚟講係有既定印象,劇情來來去去都走唔出個框架,見到呢啲劇名真係無心機去睇。


因劇名而棄劇?

我知總會有人拎萬惡嘅師奶出嚟做原因(其實師奶都好慘),話怕佢哋接受唔到新事物,怕收視低,怕無人討論。但係Come On,乜一個劇名真係會阻到一班師奶觀眾去追劇咩?

(圖源:TVB)

我見到有唔少觀眾都話屋企嘅長輩用「黃智雯」去代替咗套劇嘅劇名,仲有長輩觀眾好有創意咁叫呢套劇做「三個一」,我真心覺得呢啲觀眾唔會因為個劇名好唔好、明唔明而去決定睇唔睇一套電視劇。


劇名有餘韻係好事

咁改呢個名有無好處?撇除風雨不改都會睇無綫嘅一班鐵粉,都吸引咗一班唔睇周日檔嘅人去討論個劇名,對於放喺砲灰檔嘅劇嚟講係件好事嚟,起碼係個宣傳。劇名改得直接定要間接,係要因事制宜。電影嚟講,普遍得兩三個小時,改得簡單直接如《廣告牌殺人事件》係好事,但係改到好似《以你的名字呼喚我》仍然吸引力十足,餘韻無窮。

(圖源:電影海報)

(圖源:Youtube)

大台電視劇,通常都20集起跳,改啲意思比較曲折嘅劇名我覺得係可以嘅,只要唔離題,觀眾就有足夠嘅時間去理解。總好過直白嘅劇名但又呼應唔到套劇,畀咗合理期望啲觀眾但係就符合唔到,到時仲倒米。

編輯:Wing

編輯推薦

【方以文 | 睇乜電視啊?】應節劇集新玩法

一年伊始,祝大家新年行大運。大時大節要講意頭,新正頭開住部電視機,都希望可以睇到聽到啲開心吉祥嘢。今個農曆年,大台、新台、奇台都有製作賀歲宣傳片,無綫就喺一廠出面舞獅賀新年,奇妙電視就舞獅遊港九,...

2018-02-22 11:42

【方以文 | 睇乜電視啊?】平安谷之20詛咒

《平安谷之詭谷傳說》緊接台慶劇播出,屬於傳流收視「死期」,不過收視同埋口碑喺頭半套劇都有好反應,非常有氣勢,新計法7日跨平台總收視衝到去26點(《溏心風暴3》大結局喺新計法之下都係得30.8點),不過去到下...

2018-02-08 11:48

【 方以文 | 睇乜電視啊?】萬千星輝頒獎典禮2017主題:以愛圍家

《萬千星輝頒獎典禮2017》琴晚終於完結,結果好似以住咁多屆一樣,有爭議就預咗。其實唔使咁嬲呀,成個頒獎禮嘅潛在主題就係同《溏心風暴3》所講嘅一樣:「以愛圍家」。

2018-01-22 18:27

熱門評論

已複製連結