橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】樂壇頒奬禮要繼續搞!

文:方以文

2017年嘅樂壇頒獎禮,1月4日已經落幕,不過呢幾日依然有唔少人瘋狂咁share同討論郭富城、陳奕迅、謝霆鋒喺頒獎禮上重量級嘅表演。有人話要有呢啲重量級歌手帶起集體回憶頒獎禮先有睇頭,話應該停止搞頒獎禮,因為無意思又唔好睇。

【方以文 | 睇乜電視啊?】樂壇頒奬禮要繼續搞!(圖源:my903.com)

我認同靠消耗「前輩」嘅「餘熱」去支撐住各個頒獎禮嘅曝光率、收視、討論度唔係長遠辦法,因為回憶唔可以食成世,今日唔創造,總有一日始終係會食晒。不過我認為頒獎禮要繼續搞,原因好簡單,頒獎禮係表揚一班努力緊嘅音樂人,亦都係一個好機會畀大家認識吓新嘅歌手,承先啟後。如果無頒獎禮,喺現今主流媒體影響力日漸轉弱嘅情況之下,平時plug歌已經無乜用,如果連一年一度嘅幾個叫做樂迷聚焦嘅音樂大騷都唔搞,對樂壇真係好傷。


小圈子眾但分佈平均 奬項始終係指標

有返啲年資嘅樂迷都明白每個頒獎禮都係小圈子,我哋做觀眾聽眾無辦法只好默默接受。

【方以文 | 睇乜電視啊?】樂壇頒奬禮要繼續搞!(圖源:東華三院)

所以我自懂事以來都覺得獎項頒畀邊個都同公信力無關,頂多係用嚟分析吓勢力分布。不過各自小圈子,各自有支持同封殺嘅人,小圈子得嚟其實幾平均,睇晒咁多個頒獎禮嘅得獎者,都可以睇得出樂壇有咩人仲努力緊。呢個係我覺得要繼續搞頒獎禮嘅第一個原因。


以舊帶新最抵讚

第二個原因,就係以音樂做主題嘅大型節目真係買少見少。或者你會話都唔好睇,搞嚟做乜。但又係咪真係唔好睇呢?講返今年最矚目嘅三個環節,包括咗叱咤Eason霆鋒一頭一尾嘅演出,港台郭富城8分鐘唱跳表演同埋Eason組曲,做得好都會有睇頭。

【方以文 | 睇乜電視啊?】樂壇頒奬禮要繼續搞!(圖源:RTHK)

不過我最欣賞嘅係霆鋒嗰part,重點唔係佢個單線solo終於出山,而係因為佢個表演係同觸執毛加埋Supper Moment合作。另外有一個無乜人講嘅我都欣賞,就係喺勁歌當中蔣志光同埋胡鴻鈞合唱。我欣賞呢兩個環節,係因為佢以舊帶新。雖然有人衝出嚟問霆鋒隔籬嗰個冬菇頭係邊個,但都成功將一啲只係認識謝霆鋒嘅人,識多咗兩隊現役樂隊。


特別舞台、Crossover救巿

利用呢個每年樂迷都聚焦嘅幾次音樂大騷,以舊帶新又好,特登設計個環節畀唔同嘅現役歌手crossover都好,呢啲先係我想睇嘅嘢。每個歌手都會獨立開騷出活動,但要睇佢哋合作嘅舞台真係少之又少,尤其是喺903拉闊收咗檔之後,要見到唔同唱片公司嘅歌手合作真係好難。當各台獎項含金量下跌嘅時候,呢啲crossover表現就係救巿良方,設計得好嘅話,各台可以力捧自己鍾意嘅歌手,又可以令到個騷有獨特性。如果唔可以crossover,都可以搞吓special stage。

【方以文 | 睇乜電視啊?】樂壇頒奬禮要繼續搞!(圖源:soompi)

你睇吓MAMA,講真都只係個大啲嘅小圈子,一樣係無嚟無獎拎(定係無獎拎無嚟?),但點解都咁高收視咁萬眾期待?除咗因為韓星大勢之外,仲係因為舞台設計靚,又有唔同歌手嘅特別表演,仲有唔同公司歌手合作演出,呢啲先係吸引人睇嘅精髓。

責任編輯:李玥展

編輯:Wing

編輯推薦

【方以文 | 睇乜電視】《降魔的番外篇》後 BigBig Channel點玩好

《降魔的番外篇 – 首部曲》挾住《降魔的》嘅威勢,專登嘅戲院搞咗個首映一氣呵成全套劇咁播。勢就造咗,結果如何?

2017-12-29 10:07

【方以文 | 睇乜電視啊?】 溏心3 誇世代 無綫還未改的創作思維

上一篇文章提到《降魔的》以弱勝強撼贏《誇世代》嘅原因,當時我話《溏心風暴3》如果收視唔得,就可以大大聲咁同無綫高層講:「你要變!」好喇,今次真係開口中,《溏心3》嘅收視首周徘徊喺22點,睇返網民同埋傳...

2017-12-12 13:22

【方以文 | 睇乜電視】《降魔的》以弱勝強 改變看《溏心3》收視

被喻為史上最弱台慶劇《降魔的》愈播愈勇,對比起另一套星光璀璨嘅台慶劇《誇世代》,兩者同期每周平均收視都係24、25點,算係一個奇蹟。將《誇》同埋《降》比較,相信無綫都預咗。到底點解弱雞如《降》都可以同...

2017-11-27 13:10

熱門評論