橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】 溏心3 誇世代 無綫還未改的創作思維

文:方以文

上一篇文章提到《降魔的》以弱勝強撼贏《誇世代》嘅原因,當時我話《溏心風暴3》如果收視唔得,就可以大大聲咁同無綫高層講:「你要變!」好喇,今次真係開口中,《溏心3》嘅收視首周徘徊喺22點,睇返網民同埋傳媒對呢套劇嘅反應,我諗嚟緊都仲有下跌嘅空間。

(圖源:劇集宣傳海報)

按常理推斷,大台金禧台慶劇,必定係動用全台最好嘅台前幕後製作團隊同資源去做好件事,我亦都相信無綫係用盡力用自己認為啱嘅方法去做。四套台慶劇,頭兩套《老表,畢業喇!》同埋《降魔的》要嚟抄熱氣氛,《溏心3》同埋《誇世代》先係真章,你見啲宣傳力度有幾大分別就知道。

不過近年無綫愈用力做嘅劇,大部分都係慘淡收場,反映咗無綫愈來愈捉唔緊觀眾口味,以往嘅製作劇集思想招數亦都己經outdate。


「視聽之娛」不能滿足觀眾

《溏心3》繼續以招牌式嘅家庭爭產互相指罵做賣點。2007年嘅《溏心1》係咁,2008年得到50點高收視嘅《溏心2》變本加厲,2017年嘅《溏心3》再copy。不過事隔十年,你唔化唔進化,觀眾都會進步。《溏心》系列一直都着重喺「視聽刺激」嘅掌摑互罵、大戲式嘅瞪眼藐嘴,喺《溏心3》播之前嗰個星期日日播嘅宣傳片亦都講到明今輯「金句爭產加碼」。

【方以文 | 睇乜電視啊?】 溏心3  誇世代 無綫還未改的創作思維(圖源:網上《溏心風暴》第1、3輯截圖)

在下我只係覺得將粵語長片嘅橋段用現今機器再拍多次。而網上一面倒嘅意見都係話「好嘈、好老套」。唔與時俱進,仲以為觀眾睇劇只係為咗製作團隊自以為嘅「視聽享受」,表現手法仲停留喺十年前,喺娛樂事業嚟講唔進步就註定要失敗。依家諗返當年ViuTV停咗唔畀佢哋拍《黃金風暴》做開台劇真係個明智嘅選擇。


純賣卡士、頭中尾高潮失效

《誇世代》亦都顯示出另一個無綫擁抱嘅舊概念:「有卡士就大晒」。開播之前嘅宣傳廣告除咗賣「搞笑浮誇」之外,就係「五生五旦,強勁客串卡士」。下筆之時播咗25集,劇情仍然係碎濕濕,我覺得係今年浪費卡士之最。

(圖源:劇集宣傳海報)

有觀眾話劇情喺25集之後會緊湊返,呢個又係另一個無綫劇集嘅「傳統」,只係着重「開頭、中段、後段」三個位,搵啲有經驗嘅編導去搞,其他就由得啲經驗淺嘅自生自滅。呢招喺以前娛樂少嘅時候係行得通,吸引咗你開始睇,中段又吊下你癮,尾段發下力就可以箍住一班觀眾。

到咗今時今日,觀眾唔好睇就熄電視或者轉台,上網又乜都有得睇,唔使你喂乜我食乜,以咁嘅方式去創作劇本已經無用,尤其係《誇世代》呢種50集嘅長劇,就更加將呢個缺點表露無遺。加上香港歌影視明星嘅號召力減弱,單靠擺個卡士喺劇度就可以穩住收視呢條橋唔work。劇本拍攝製作唔配合一樣死。

(圖源:TVB)

用金禧台慶劇嚟睇穿無綫擁抱老舊思想,對於大台嚟講係一個沉痛嘅代價。50周年做唔出個氣勢,以後嘅路就更難行。有人話要無綫用一日就可以轉身係不設實際,但呢篇文所講嘅嘢都唔一夕一日發生嘅事,希望佢今次仆得愈甘,醒得愈快。

責任編輯:李玥展

編輯:Wing

編輯推薦

【方以文 | 睇乜電視】《降魔的》以弱勝強 改變看《溏心3》收視

被喻為史上最弱台慶劇《降魔的》愈播愈勇,對比起另一套星光璀璨嘅台慶劇《誇世代》,兩者同期每周平均收視都係24、25點,算係一個奇蹟。將《誇》同埋《降》比較,相信無綫都預咗。到底點解弱雞如《降》都可以同...

2017-11-27 13:10

【方以文 | 睇乜電視啊?】再歡樂今宵真係再會

台慶亮燈,最令我感到愕然嘅台慶節目,一定係《我愛EYT 》。到星期六正式播嘅時候,真係好強烈咁feel到世代需要更替嘅感覺。

2017-11-15 15:17

【方以文 | 睇乜電視啊?】《降魔的》點解會係台慶劇?

千估萬估,點都唔會估到《降魔的》會贏咗其他劇成為台慶劇,當江湖吹緊呢套劇會放喺台慶期間播嘅時候,唔少人都大大聲話無乜可能......

2017-10-30 16:20

熱門評論

已複製連結