橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊】ViuTV 2018 知性旅遊打底 實況劇集突擊

文:方以文

你有無睇無綫嘅台慶亮燈節目呀?今年50周年台慶真係好得人驚,劇集綜藝無一個節目令我有「嘩好想睇呀」嘅感覺。


大台的兩部台慶劇《誇世代》和《降魔的》。(圖源:維基百科)

個人覺得可以睇吓嘅劇集只係得《降魔的》,話用咗「五生五旦」[編按:五位小生、五位花旦](我數唔到)嘅台慶劇《誇世代》伏味勁濃,嗰段預告片好鬼得人驚,無劇情、無情節、無畫面……而其他劇集同節目都係續集或者換主持唔換橋舊嘢新拍,無乜驚喜之餘,亦都可以見到大台愈來愈固步自封(或者佢已經將創新嘅使命交咗畀Big Big Channel,但做唔做到年輕創新又係另一個問題)。


知性旅遊才是新台根基

相反,上星期一10月9日舉行ViuTV嘅2018節目巡禮就有新意得多,續集一樣唔講咁多(好喇講一句:好想睇《衝三小喪玩星馬泰》)。我嘅焦點反而唔係新台主力谷嘅「實況綜藝」,而係佢哋嘅「知性旅遊」節目。

Viutv出品的旅遊節目,好似《暗中旅行》同《404不存在的國落》都受到好一致好評。(圖源:宣傳片截圖)

正如主持駱振偉所講,ViuTV嘅旅遊節目(其實仲包括住now之前嘅《一個地球》),都絕對唔係「食、瞓、玩、買」咁簡單。開台至今最令我欣賞,亦都得到「電視節目欣賞指數」嘅,係《暗中旅行》同埋《404不存在的國落》。前者有健視者同視障人士一齊去旅行,仲有聲音導航,視障人士都可以收聽;後者就去地圖上面無嘅國家地區,講文化歷史。仲有滄海遺珠《異國二域》,搵咗沈旭暉教授去全球實行「一國兩制」嘅地方。其實好好睇﹗


大台重複「食、玩、買、露」

嚟緊2018年,我最期待Viutv嘅節目有去到前戰線嘅《前前線》同埋去探返以前家傭嘅《最熟悉的陌生人》,有橋、有意思。或者有人睇到呢度,會話無綫都有啦!

《最熟悉的陌生人》其中一位主持人就係藝人唐寧!(圖源:ViuTV專頁影片截圖)

之前洪永城《走過烽火大地》,袁偉豪加楊明嘅《打工捱世界》、陳貝兒《嫁到這世界邊端》咪係囉。係嘅,畀你計埋高質但放喺J2度播嘅《背遊中美》、《背遊中亞》,仲有隔足唔知幾多年先有嘅探險真人秀節目《天與地》好無?之不過更多嘅係瘋狂浸溫、瘋狂shopping、瘋狂講演員之間友誼嘅旅遊節目。間唔中睇吓,可以,但佢嘅密集程度,令人講覺呢個世界只係有玩樂購物,睇仔睇女就足夠。我就buy「知性節目」多啲喇。

實況戲劇突擊

知性節目對於ViuTV製作上嚟講十拿九穩,希望佢哋出力啲宣傳,打好個底,再用劇集搶攻。劇集方面我覺得新台已經捉到條路,喺《前度》仆直之後唔力推愛情劇,轉去做「人生實況劇」,講社會現象、人際關係。幾部喺節目巡禮有宣傳嘅劇集,除咗我唔認同佢係「好口碑」嘅《詭探2》之外,《身後事務所》講人死後幫佢身邊嘅人解心結、《迷失假期》嘅幫人尋根同時自我發掘、《VR驅魔人》用搞笑鬼片去諷刺社會問題,全部都係有的放矢。

其中一部節目巡禮有介紹的劇集,就係由樂隊Rubberband的6號同演員吳肇軒主演的《身後事務所》,講述他們幫各委託人處理身後事而引發的各種事情。(圖源:吳肇軒 專頁)

有人話自從《矛盾2》「王丹馮敬恩事件」之後,ViuTV嘅政治色彩愈來愈淡,但我話只係轉咗面嗰浸,根本「貼地在地」嘅目標仲喺骨子裡。最近成功令到觀眾有話題嘅兩套劇《未來還未來》、《短暫的婚姻》,都係現實劇。之前嘅《賤民20》其實都係開呢瓣,只係眼高手低咗。希望ViuTV可以繼續做好啲,打好基本功,以「知性旅遊」打底,再用「實況戲劇」做突襲,刺激吓大台呢位老屎忽。無論邊個電視台有好嘢睇,都係我哋觀眾嘅福氣。

編輯:Wing

編輯推薦

【方以文 | 睇乜電視啊?】《未來還未來》ViuTV終於命中紅心

《綠豆》同《三一如三》,之後嘅《午夜伴廊》、《詭探》、《賤民20》仲有今個星期五大結局嘅《未來還未來》,全部基本上都係沿用「大台唔做我先做」嘅概念。一播就見到佢真係想玩到好大,但勁多甩漏。呢種尷尬,...

2017-10-03 17:22

【方以文 | 睇乜電視啊?】火雞救「蔡思達」?

《踩過界》喺一片歡呼聲之中落幕,大結局平均收視有26點。放咗喺周六日檔期,再加上大陸網先播嘅影響之下,呢個收視相對於《同盟》大結局30點嚟講真係唔錯,四位主角更加被熱捧做今年電視獎項大熱。

2017-09-22 15:16

【方以文 | 睇乜電視啊?】《外母》與《賤民》兩台典型死因

《燦爛的外母》、《賤民20》唔少觀眾睇完第一個星期頭五集,都決定兩邊都棄劇唔睇。連埋「燒槍版溏心風暴」《同盟》,我形容呢半個月踏入咗電視寒冬。

2017-09-05 09:48

熱門評論

已複製連結