橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】《未來還未來》ViuTV終於命中紅心

文:方以文

ViuTV一開台時,打正「實況綜藝」做旗號,對抗最大對手無綫嚟講係好嘅方向。畢竟爛船都有三斤釘,同專做劇集嘅無綫正面對打始終無着數。要「實況」又要有gimmick,做大台唔做嘅政治人物同題議,就係一個好好嘅選擇,而新台又真係靠開台主打《跟住矛盾去旅行》吸到一班觀眾。


(圖源:《跟住矛盾去旅行》截圖)

不過自從《矛盾2》嘅「馮敬恩王丹事件」之後,佢哋有關於政治嘅「實況綜藝」就只係播咗一套由前立法會主席曾珏成做嘅《埋班》,唔知係咪因為前車可鑑而收緊咗個尺度,最後唔夠爆亦無乜回響。當實況娛樂逐漸收檔,加上《綠豆》被網民熱捧,可能令新台轉咗方向,喺一周年之際,開始星期一至五夜晚2130橫線播劇,同大台死過。


「大台唔做我先做」

唔計變陣前只喺周一二夜晚播嘅《綠豆》同《三一如三》,之後嘅《午夜伴廊》、《詭探》、模仿《綠豆》不力的《前度》、《賤民20》仲有今個星期五大結局嘅《未來還未來》,基本上都係做啲大台唔會做嘅嘢:《午夜伴廊》搞笑咁去講都巿變化中嘅小人物。《詭探》就係神怪劇。《賤民20》係Cult片。


(圖源:網上)

全部基本上都係沿用「大台唔做我先做」嘅概念。不過好多都係得個聲勢(有啲直情聲勢都無),一播就見到佢真係想玩到好大,但勁多甩漏。呢種尷尬,有好多觀眾包括我都畀咗無限嘅耐性同埋心機去忍去支持,希望佢有朝一日可以發圍。終於,我哋含淚等到喇!

Mocumentary手法聰明


(圖源:ViuTV Facebook專頁)

《未來還未來》故事講四個90後主角喺社會職場生活上遇到嘅事,本身個設計啱晒新台想要嘅年輕觀眾層(亦都有一班擁有年輕的心嘅觀眾),而且對家係播緊警匪槍戰嘅《使徒行者2》,兩個客源分得好開,造就咗《未來還未來》嘅一個機會。


(圖源:Tim Lui @ Facebook)


導演兼編劇之一嘅Tim Lui無拍電視劇嘅經驗,今次喺大約三個月嘅時間裡面由編劇開始,到播緊頭幾集時都仲剪緊未街嘅集數,咁急之下劇本故事拍攝完整,真係勁。

用Mocumentary(仿紀綠片)嘅形式,亦避過咗好多剪接同埋劇本上嘅問題:總共十集半個鐘劇嘅長度,要講4個人其實唔夠時間,不過用Mocumentary方法,角色可以對住鏡頭講心底話,直接好多,減少咗要劇情砌出嚟表達嘅時間,亦都少咗好多因為唔夠時間而迫住要講嘅低能對白。模仿紀錄片嘅搖鏡、個鏡頭跟住角色去走,都避免咗好多拍攝鏡頭上嘅設計。對於新手導演,加上咁短嘅製作期,咁做係一個聰明嘅做法。


10集長度 放棄感情線

今次亦都跳出咗大台差唔多套套劇都有感情線嘅定律,專心一致講4個角色事業上嘅事。唔係話講感情線唔好,但寫得多、睇得多都係老套,好影響套劇嘅「新鮮味」。尤其是得十集,要培養觀眾對角色嘅感情已經唔容易,仲要建構角色之間嘅感情就更複雜。


(圖源:ViuTV Facebook專頁)

今次捨難取易,導演唔知有無精心計算過,或者佢係隨心而行,但咁多方面加埋,成為今次新台少有受到絕大觀眾好評嘅劇集。

今次新台有起色,可喜可賀。不過希望新台見到今次成功之後,唔好忘記「創新」呢個初衷,唔好套套劇都複製《未來還未來》。如果唔係就會同大台一樣,得ABC餐畀觀眾揀,觀眾就真係喊出嚟。

責任編輯:李玥展

編輯:Wing

編輯推薦

【方以文 | 睇乜電視啊?】火雞救「蔡思達」?

《踩過界》喺一片歡呼聲之中落幕,大結局平均收視有26點。放咗喺周六日檔期,再加上大陸網先播嘅影響之下,呢個收視相對於《同盟》大結局30點嚟講真係唔錯,四位主角更加被熱捧做今年電視獎項大熱。

2017-09-22 15:16

【方以文 | 睇乜電視啊?】《外母》與《賤民》兩台典型死因

《燦爛的外母》、《賤民20》唔少觀眾睇完第一個星期頭五集,都決定兩邊都棄劇唔睇。連埋「燒槍版溏心風暴」《同盟》,我形容呢半個月踏入咗電視寒冬。

2017-09-05 09:48

【方以文 | 睇乜電視啊?】需要摒棄的電視血統論

《同盟》由第一集播出開始,就有人cap圖,將鮑姐同陳展鵬嘅畫面key返亞洲電視個logo,話佢哋兩個一齊出現嘅畫面好有亞視味。呢個玩法,好多人都玩極唔厭,但我就對呢個玩法好抗拒,因為有啲血統論嘅味道。

2017-08-28 10:53

熱門評論