橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】火雞救「蔡思達」?

文:方以文

《踩過界》喺一片歡呼聲之中落幕,大結局平均收視有26點。放咗喺周六日檔期,再加上大陸網先播嘅影響之下,呢個收視相對於《同盟》大結局30點嚟講真係唔錯,四位主角更加被熱捧做今年電視獎項大熱。

(圖源:《踩過界》劇照)

有人話呢套劇放喺周一至五檔期會爆紅,呢個就真係只有天知道,不過有一樣嘢係肯定嘅:蔡思貝今次整棚哨牙加刀疤嘅火雞姐造型,的確洗到底,唔少人都對佢加分。(不過佢嘅主打戲份唔似王浩信同張振朗咁喺最後幾集先出現,如果唔係效果應該更好)

演技大考驗?

演員扮醜,尤其是女演員,傳媒都會力推,話係「演技大考驗」或者「洗底之作」。觀眾好多時都會跌入輿論風潮之中,睇到演員醜化自己就覺得「係勁喎,係努力喎」,點解會咁呢?

(圖源:《火舞黃沙》、《阿旺新傳》、《肥田囍事》截圖/劇照)

演員,尤其是力捧嘅,一定被包裝為亮麗吸引,觀眾見到鍾意係人之常情。一扮醜,「放棄」咗靚靚形象,就容易令到觀眾覺得佢「放下身段」、肯博一舖、洗盡鉛華,希望大家專注佢哋嘅演技。而好多時呢啲「醜化」角色真係會為演員帶嚟突破:《火舞黃沙》嘅「兔唇女」-周家怡、《阿旺新傳》嘅阿好-湯盈盈、《肥田囍事》嘅肥田-胡杏兒,醜化造型往往都係傳媒嘅焦點,喺播劇當下氣勢如虹,不過考驗亦隨之而來。

學懂投入角色

醜角色一定比起普通角色嘅背景更加豐富,至少「醜」可以增加角色嘅心理層面,最容易見到嘅處理係「自卑」同埋「自強」,加上變肥變醜,一定會喺身體上有所改變,好多小動作或者動態就會隨之而來,所以呢一類醜角色對相起其他角色容易做好多,做演員只要突破到「醜」,可以「放」,喺各方配合之下,好有機會可以突破到往績,得到觀眾認同。

(圖源:《踩過界》截圖)

演員做呢啲角色,如果捉到路知道點樣去投入角色當中,對之後嘅演戲會好有幫助。不過演員講努力亦都講天份,你見唔少做過呢啲醜角色嘅人都畀呢啲角色纏身,幾年甚至幾十年後都搣唔甩。

睇造型亦要睇演技

當然我唔係想抺殺演員演繹「醜角色」時嘅努力,造型亦都好重要,鄧萃雯拍《巾幗梟雄》時到開拍嗰一朝早都仲捉住美指研究同改角色造型,因為佢相信造型要令到佢有「上身」感覺先可以演到好戲。當然各有各做法,亦各有各造化。


(圖源:sisleychoi @ Instagram)

下次觀眾見到啲醜角色之時,仍舊可以留意佢哋嘅造型,但亦要請留意演員演技到底有無變化,不論係進步定退步。咁先不枉台前幕後為呢位演員度身訂做一個「醜角色」。

責任編輯:李玥展

編輯:Wing

編輯推薦

【方以文 | 睇乜電視啊?】《外母》與《賤民》兩台典型死因

《燦爛的外母》、《賤民20》唔少觀眾睇完第一個星期頭五集,都決定兩邊都棄劇唔睇。連埋「燒槍版溏心風暴」《同盟》,我形容呢半個月踏入咗電視寒冬。

2017-09-05 09:48

【方以文 | 睇乜電視啊?】需要摒棄的電視血統論

《同盟》由第一集播出開始,就有人cap圖,將鮑姐同陳展鵬嘅畫面key返亞洲電視個logo,話佢哋兩個一齊出現嘅畫面好有亞視味。呢個玩法,好多人都玩極唔厭,但我就對呢個玩法好抗拒,因為有啲血統論嘅味道。

2017-08-28 10:53

【方以文 | 睇乜電視啊?】《踩過界》死得慘 大台管治出問題

《踩過界》上星期播完第14集,即係第一季已經做晒,我想嚟個中場討論。本身套劇就算有負評跟身嘅蔡思貝喺王浩信、李佳芯、張振朗,再加埋每個單元嘅受害人超水準發揮之下,截至第12集,最高收視24點、平均收視最...

2017-08-09 09:21

熱門評論

已複製連結