橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】《外母》與《賤民》兩台典型死因

文:方以文
上星期一8月28日開始,無綫首播由家燕媽媽擔大旗,拍住黎諾懿、湯諾雯嘅喜鬧劇《燦爛的外母》,ViuTV就首播由陳炳銓策劃,連同王宗堯、民間港姐吳海昕主演嘅《賤民20》。唔少觀眾睇完第一個星期頭五集,都決定兩邊都棄劇唔睇。連埋「燒槍版溏心風暴」《同盟》,我形容呢半個月踏入咗電視寒冬。不過今次寒冬亦都令到兩個台嘅特色顯而易見,兩台想突破嘅話就要捉住呢兩套劇諗諗佢(如果兩台真係有興趣有力量去突破的話)。

守舊與創新 邊個贏?

棄劇總括嚟講得兩個原因:「估到晒」同埋「睇唔明」。代表死舊派嘅作品《燦爛的外母》,以有一定(大年紀)支持者嘅薜家燕做主角,再配上你唔睇幾集都可以估得返之前劇情嘅劇本,sell嘅係熟人同埋熟悉感。唔使你用腦,再配埋家燕姐滑稽嘅肢體演繹,真係三歲到八十歲都睇得明。鍾意「聽電視」嘅觀眾一定好開心,但想用少少腦去追劇嘅人就真係唔會睇。

另一邊廂,《賤民20》打住Cult片旗號出戰,第一集以炒雜錦碎上倒敍方法去講故事,血腥、暴力、低水平CG元素統統有齊,但我個人理解Cult片唔係要人睇唔明,反而係有個好清晰嘅主題。睇完頭五集方向係清晰咗(我覺得甚至清晰過《前度》),但第一集真係太過趕客,用半個鐘時間已經可以收自己檔,趕自己入死路,只因「太高」。喺我Facebook專頁嗰邊,就連一班支持開新台嘅觀眾都話頂唔順,一係就含淚支持。

(圖源:劇集宣傳片截圖)


爭取收視與建立品牌

你會話觀眾好難服侍。都啱嘅,因為免費電視要照顧嘅係普羅大眾,普羅大眾就係有唔同人,好難照顧得晒。黃金時間就係最多人收睇嘅時段,要照顧觀眾之餘,一拼打造自己嘅風格,咁就最完美。無綫就趨向前者,ViuTV就貼近後者,《外母》同《賤民》係好好嘅例子。如果以兩邊嘅目標嚟評論兩套劇成唔成功,無綫就一定係成功,因為第一個星期嘅平均收視有26點,最高衝到去30點,輕輕鬆鬆食咗糊。

而ViuTV呢?就連一班支持開佢哋嘅觀眾都話唔得掂,雖然照慣例唔會公布收視,但似乎兇多吉少。而《賤民20》就為ViuTV進一步建立「玩味創新」風格,可唔可以吸引到一班希望創新突破嘅觀眾就拭目以待。如果以觀眾基本盤去諗,ViuTV今次真係兵行險著。

(圖源:劇集宣傳片截圖)

兼顧創意與製作水平

不過有一點係可以好肯定,就係無綫嘅製作水平比起ViuTV真係高好多。《外母》係老套係悶,但係呈現到個劇情,製作紥實。《賤民》靠嘅係新鮮感,如果拍攝水平嚟講,真係同學生習作差唔多。知嘅明嘅,要畀啲機會新台嘛,其實大家都好包容,用唔同嘅尺去睇兩個台嘅作品。

但新台有一日都會變老,希望佢可以喺呢一日嚟之前,快啲提高製作水平。無綫方面,想佢創新?你睇吓剛剛播完嘅《最緊要好玩》就知呢個係天方夜譚啦,一齊等睇家燕姐喺劇度跳十字步啦,唏呀唏呀唏。溝埋做瀨尿牛丸?咁又唔好,咁咪即係冇得揀?
責編:李玥展

編輯:Dustin

編輯推薦

【方以文 | 睇乜電視啊?】需要摒棄的電視血統論

《同盟》由第一集播出開始,就有人cap圖,將鮑姐同陳展鵬嘅畫面key返亞洲電視個logo,話佢哋兩個一齊出現嘅畫面好有亞視味。呢個玩法,好多人都玩極唔厭,但我就對呢個玩法好抗拒,因為有啲血統論嘅味道。

2017-08-28 10:53

【方以文 | 睇乜電視啊?】《踩過界》死得慘 大台管治出問題

《踩過界》上星期播完第14集,即係第一季已經做晒,我想嚟個中場討論。本身套劇就算有負評跟身嘅蔡思貝喺王浩信、李佳芯、張振朗,再加埋每個單元嘅受害人超水準發揮之下,截至第12集,最高收視24點、平均收視最...

2017-08-09 09:21

【方以文 | 睇乜電視啊】不務正業?大台孤注一擲Big Big Channel

啱啱喺7月24日夜晚有睇大台嘅,會唔會以為佢提早咗台慶?喺一廠全台總動員,又跳舞又唱歌咁,分分鐘卡士勁過舊年我認為最悶嘅台慶。無他,為咗全力去推繼電視、myTV SUPER之後嘅第三大平台:Big Big Channel。

2017-07-26 11:19

熱門評論

已複製連結