橙新聞

方以文 睇乜電視啊?

電視迷,未成精。好就讚,唔好就彈。電視以外,電影、舞台劇都啱。視覺刺激為先,有內涵為重。

【方以文 | 睇乜電視啊?】《踩過界》死得慘 大台管治出問題

文:方以文

《踩過界》上星期播完第14集,即係第一季已經做晒,我想嚟個中場討論。本身套劇就算有負評跟身嘅蔡思貝(先旨聲明佢做戲好過同期其他姐仔好多,我支持佢),喺王浩信、李佳芯、張振朗,再加埋每個單元嘅受害人超水準發揮之下,截至第12集,最高收視24點、平均收視最高20點,喺周六日本身收視唔高嘅情況之下,似乎真係殺出咗條血路。不過依我愚見,係一條血跡斑斑嘅砲灰路。

《踩過界》宣傳海報


周六日拉低平均收視

在所難免睇番啲資料。由2015年4月開始,無綫將2130線劇由周一至五播,改成周一至七日日播,頭砲外購陸劇范爺嘅《武則天》係威係勢,將周六日嘅收視拉起咗。不過無咗重頭劇座陣,好快就回落。

《武媚娘傳奇》劇照

雖然未至於差過周六日播劇前嘅收視,但係有個大問題,就係套套放喺2130線嘅劇,都因為周六日普遍都低啲嘅收視,拉低咗全劇平均收視。


Call廣告議價力降低

2015年最高收視《鬼同你OT》、2016年最高收視《城寨英雄》都喺2130播足七日,都有周六日拉低收視嘅效應。唔計大結局,平均都拉低一兩點。最誇張係《鬼同你OT》第一個周六,平均收視跌咗6點。

就算係好受歡迎嘅《城寨英雄》,去到星期六、日收視都係會有下降嘅情況出現。(《城寨英雄》宣傳海報)

睇埋2017年上半年,最高收視劇集第一、第三位,分別係放喺2030周一至五播嘅《親親我好媽》同外購陸劇《射鵰英雄傳》。第二位係日日播嘅宣萱、林文龍回巢嘅《不懂撒嬌的女人》,強勢之下,唔計大結局效應,周末收視最叻都係保持返周一至五嘅水平。

《不懂撒嬌的女人》係少數播足一至日,收視都唔會下滑嘅劇集。(《不懂撒嬌的女人》宣傳海報)

講咁多,即係話想靠日日播劇做協同效益,拉高收視呢條橋唔係好work,仲拉低埋劇集嘅平均收視,對於call廣告嘅議價能力打咗折扣,呢條數點都計唔掂。

周六日劇《飛虎》曾創36點收視

我等佢2130變返周一至五播劇,睇到頸都長,不過勢估唔到第一套係王晶嘅《賭城群英會》,我就唔用呢套劇去分析效果喇,連提都唔想提佢。真係估唔到嘅,仲包括開周六日線,播都幾多人期待嘅《踩過界》。

《飛虎》宣傳海報

正如好多觀眾咁講,好想《踩過界》放返喺周一至五播,因為窒住道氣睇得唔過癮。不過睇返轉頭,周六日播劇唔係新鮮事,最傳奇嘅周六日劇,有最高收視去到36點、平均收視最高31點嘅《飛虎》。事實證明咗周六日唔係問題,而係套劇出咗問題。



hooker錯晒位 神仙難救

好嘅劇本要每分鐘都扣住觀眾,但做到咁係難,尤其是一個鐘頭嘅劇集。最合理係喺每個廣告前做個小高潮,每集最後做個大高潮,扣住啲觀眾喺廣告位唔好熄電視或者轉台,第二日要開電視睇。行內人叫呢啲位做「hooker」,即係勾,勾住啲觀眾。

無論係TVB還是ViuTV,好多時劇集尾聲都無「hooker」可以吸引到觀眾,等佢哋第二日乖乖哋開電視。(《瑪嘉烈與大衛-前度》劇照)

不過依家各位觀眾有眼見,無論係無綫定係ViuTV嘅劇集,好多時都無hooker,或者喺一星期尾嘅時候先至有個高潮仔博你下星期一繼續睇。周一至五觀眾留喺屋企嘅機會高啲,所以無乜影響,鍾意睇港劇嘅好多都焗睇。但係周六日就唔同玩法,一家大小出街搵節目食吓飯,無吸引力一定死,喺無咗周一至五嘅協同效應之下就更甚。

踩過界死得好慘

《踩過界》節奏明顯比一般無綫劇快趣,平均兩三集就一個case,或者可能因為咁而被人掉咗落呢個時段。不過你見到28集,都估佢係為咗星期一至七日日播而拍。如果係咁,當佢做到足,逢周五六日嗰集做啲功課,吸人去睇下一集,即係有12集係畀咗心機。

但一轉咗做周六日播,你就要集集勾住觀眾去睇,周日嗰吓仲要出盡力。對應番個排位,扑到正一正嘅就只得第14集同第28集。第14集,即係剛剛播咗嗰集,真係睇到佢拋咗其中一條最主要嘅線:盲俠同文叔之間嘅關係,用咗幾集去鋪去谷,呢個推斷亦都喺大陸網度以14集作為第一季嘅結尾可以引證推斷到。依家咁玩法,真係為呢套劇嘅台前幕後難過。

何必自亂陣腳?

講咁耐,即係得一個結論:政策急亂無編排。如果真係想打返開周六日嘅線,就應該度劇本題材時已經要做功夫,好似上一段咁講集集都要用力,喺今時今日嘅生活節奏嚟講,十集左右差唔多。開28集播足超過三個月,等於自殺。

用本來拍嚟日日播嘅劇去做先鋒,就即係叫個馬拉松選手去跑100米,世界冠軍都一定死。傳聞接《踩過界》棒嘅《降魔的》睇嚟都係兇多吉少。依家其他台不足為懼、未成氣候,大台咁樣自亂陣腳法,真係好戇居。係咪全力谷Big Big Channel,其他嘢就乜都唔理?你唔理又唔畀其他人理,係咩玩法?

編輯:Wing

編輯推薦

【方以文 | 睇乜電視啊】不務正業?大台孤注一擲Big Big Channel

啱啱喺7月24日夜晚有睇大台嘅,會唔會以為佢提早咗台慶?喺一廠全台總動員,又跳舞又唱歌咁,分分鐘卡士勁過舊年我認為最悶嘅台慶。無他,為咗全力去推繼電視、myTV SUPER之後嘅第三大平台:Big Big Channel。

2017-07-26 11:19

【方以文 | 睇乜電視啊?】《前度》事前掃毒 請與《綠豆》分割

新台雖然開台未到一年半,但數鎮台之寶一定有《瑪嘉烈與大衛系列 綠豆》份,對於最初只係主打實況娛樂嘅新台嚟講,套劇嘅口碑同成績都係喜出望外。《綠豆》大結局喺今個月初啱啱播出一周年,我喺Facebook專頁舊劇...

2017-07-14 08:59

【方以文 | 睇乜電視啊?】《賭城群英會》的重複與災難

大台喺半年之內,連推兩套賭劇,繼今年1月嘅《乘勝狙擊》之後,有6月19日開始播嘅《賭城群英會》。喺播之前,觀眾們對於《賭城群英會》的反應好兩極,話會睇嘅就係因為個卡士勁:有謝賢、劉兆銘、佘詩曼、陳法蓉...

2017-06-23 11:20

熱門評論