橙新聞

聞西

任職金融界的美食達人、作家。給單身人士的晚餐食譜,教你一個人,也要好好食,好好愛自己。

【單身食錄 | 聞西】不再令情人失望川味嘅三色蛋

圖、文:聞西
    
年過四十已經唔再係年輕力壯小伙子,諗乜嘢都會長遠啲。雖然對煮嘢仍然好有執著,不過對感情呢方面反而睇化咗唔少。你問我想唔想有個伴?梗係想啦!其實拍拖嘅機會真係好鬼多(如果我肯),之不過遇到嘅都係比我年輕十幾年嘅朋友仔,唔係好識珍惜我,簡單如約食飯咁,有啲突然通知話唔舒服想休息,轉個頭又見佢唱K,有啲更過分直頭甩埋底no show,害我煮好飯呆等浪費一番心機,真係好失望!
       
所以今年情人節再接再厲唔關聞事囉!不過咁世界都有美好嘅一面嘅,好似男讀者阿K(化名)咁,對拍拖兩年嘅女友仲好有heart, 佢話情人節想喺屋企煮餐俾女友食喎,又可以慳番啲錢買花,可惜女友喜歡食中多過食西,問我有乜建議喎!其他餸就自己上聞西煮意大把有得揀,今日就介紹一個簡單嘅前菜比佢,中式三色蛋都可以攪到好fusion 咁,好過食鵝肝咁殘忍啦!
     
【材料】
    
  
雞蛋4隻、皮蛋2隻、鹹蛋2隻、蟹籽50g、莞茜1棵、牛奶或鮮忌廉100ml、花椒油及川椒粉適量
   
【調味】
生抽1茶匙、紹興酒1茶匙(唔落都得)、粟粉1茶匙(用少少水開)
  
【做法】
 
1.冷水放咸蛋及皮蛋,開火煮滾5分鐘後熄火,取出浸凍水降溫剝殼備用,點解皮蛋都要煮嘅?因為煮熟咗個糖心就唔會整到蛋漿變灰色囉,大嘥啲可以唔要個糖心,咁出嚟效果就最靚喇!
    
2.雞蛋落調味料打勻,之後落牛奶或鮮忌廉再次打勻,最後用隔網過濾一下蛋就會更加滑喇!

3.將咸蛋及皮蛋切粒粒,然後加入蛋漿伴勻,凖備一個窄長蛋糕模,喺裡面搽少少油,然後倒入蛋漿,用細火滾起計蒸20-25分鐘,或者用筷子篤下佢檢查熟透未,熄火後由得蛋自由冷卻(大約一個鐘),如果無蛋糕模咁用深啲嘅碗都可以,不過要預先鋪一層保鮮紙先落蛋漿。 
  
4.將“蛋糕”小心倒出嚟切成厚片,然後用油掃喺每片搽上一層花椒油,再撒少少川椒粉,最後放上莞茜及蟹子即可!其實你肯煮,佢食咸蛋都覺得甜絲絲啦!喺咪~呵呵~
   

編輯:Stacy

編輯推薦

【聞西 | 單身食錄】碗仔蒸蘿蔔糕 鮮甜清爽的秘訣

【聞西 | 單身食錄】碗仔蒸蘿蔔糕 鮮甜清爽的秘訣

今次教大家整嘅係蒸蘿蔔糕,落咗大量胡椒粉,先可以引出蘿蔔嘅鮮甜,所以除咗例牌有嘅冬菇絲之外,我亦加咗日式辣雪菜同胡椒粉,辣辣地好惹味整,而且入口仲好滑添!

2017-02-03 09:26
【單身食錄 | 聞西】過年系列 臘鴨髀蘿蔔湯

【單身食錄 | 聞西】過年系列 臘鴨髀蘿蔔湯

煲湯唔一定要用金華火腿嘅,有無試過用臘鴨髀代替呢,一來平好多,乾淨衛生唔怕有蟲蟲,二來蘿蔔吸收哂啲鴨油同咸香味道,真係好正!

2017-01-31 10:09
【聞西 | 單身食錄】年糕不如黃金玉米餅 拜年又環保

【聞西 | 單身食錄】年糕不如黃金玉米餅 拜年又環保

近排我都收到好多讀者叫我教整年糕,即係咁年糕其實我無乜興趣整,而且每年都會收到好多,根本就食唔哂。我就諗不如整下其他嘢等拜年嘅時候招乎下人啦,所以就諗起呢個我鄰居阿dee姐姐經常整嘅粟米餅喇。

2017-01-19 15:06

熱門評論