橙新聞

聞西

任職金融界的美食達人、作家。給單身人士的晚餐食譜,教你一個人,也要好好食,好好愛自己。

【聞西 | 單身食錄】新年新滋味 滑嫩過癮的花生醬咖哩雞

圖、文:聞西
      
應該無乜人唔鍾意放假掛,新年第一個星期真係好精彩,小弟星期一先由台北返歸,返咗幾日工又到除夕放二日半,好爽耶!一如以往,老人家我怕熱鬧怕人多又怕應酬,所以已經連續第三年選擇去西貢宿營靜靜咁同2016講bye bye,1月1日晨咁早起身行出沙灘等睇第一道曙光,點知上面唔爭氣,舊雲厚過棉胎,等到七點都係乜都睇唔到,好在有隻唔怕死嘅蟹仔企定定俾我地一班失望嘅朋友影相,所以當日Facebook 洗版嘅估唔係2017晨光第一蟹喇!哈哈⋯
      

與大家分享晨光中既第一隻蟹……

估唔到嘅仲有我今日要教大家煮嘅餸「花生醬咖哩雞」 嘩⋯咪以為我走火入魔,加咗花生醬之後,本來辣辣嘅咖哩汁變得平易近人,仲多咗一份東南亞味道添,今次我專登用咗粗粒花生醬,汁裡面都會有花生粒,食嘅時候就更加過癮啦!其實仲可以用原味乳酪代替椰漿,效果一樣咁滑又健康啲!
       

【材料】
  

雞半隻,或者用雞中翼代替都可以、番茄2個、洋蔥1個、蒜頭3粒、薑2片、薯仔半斤,我去咗一田買日本薯仔,真係好食好多㗎,其實唔會貴得過街市幾多,最重要係可以放心咁食埋啲薯皮呀,牛油20g(用嚟起鑊用)。
    
【醃料】
鹽及胡椒粉¼茶匙、咖喱粉2茶匙、油1湯匙
     
【調味料】
原味乳酪100ml、花生醬3-4湯匙
     
【做法】
   
1.雞件洗乾淨之後落調味料醃15分鐘備用。

2.準備其他材料:番茄去籽再切粒、洋蔥同樣切粒、薯仔洗乾淨表皮啲泥然後切件。

3.牛油加橄欖油起鑊(其實用鐵鍋hehe),先爆香薯仔、洋蔥、薑及蒜頭,然後可以落雞件繼續半煎炒至金黃色。

4.落埋啲番茄,加水至材料表面,冚蓋滾起計用細火炆30分鐘,然後落花生醬同乳酪開蓋再煮多5分鐘就攪掂喇!如果覺得水份唔夠,呢個時候可以加少少水,不過記住啲汁唔可以太稀㗎!

就係咁我嗰晚食咗兩大碗飯⋯好飽好滿足!哈哈⋯

編輯:Stacy

編輯推薦

【單身食錄 | 聞西】泰式新花樣!番茄冬蔭公雞煲

【單身食錄 | 聞西】泰式新花樣!番茄冬蔭公雞煲

我好喜歡用新鮮嘅冬蔭公香料包,衣家好多超市同街市都有得賣。平時飲冬蔭公除咗辣之外,個酸味都好重要,不過我覺得出街食到嘅冬蔭公個酸辣太過搶喉,所以今次我就用咗茄膏代替,整個效果就完全唔同哂!

2016-12-23 11:01
【聞西 | 單身食錄】土魷豉油皇炒麵 搵返熟悉的老味道

【聞西 | 單身食錄】土魷豉油皇炒麵 搵返熟悉的老味道

最近不約而同有兩個朋友話衣家啲豉油皇炒麵好難食,唔知點解超油超濕,我試過連鎖粥麵店嗰啲又「碎濕濕」咁,而且感覺佢哋落味精都幾重手添,咁不如試下我嘅自家炒麵食譜啦,又睇下可唔可以幫你尋找消失的過去炒...

2016-12-30 09:27
【聞西 | 單身食錄】男人青春返晒嚟!羅漢果黃耳素薑醋

【聞西 | 單身食錄】男人青春返晒嚟!羅漢果黃耳素薑醋

我識得有個friend仲勁呀,佢就係小虎隊嘅胡渭康弟弟,點解叫佢做弟弟,因為佢個樣仲後生過我好多,簡直係又白又滑呀!前幾日我帶咗佢同KEVOLIE創作總監花美男Kev齊齊去銅鑼灣怡東軒食好西傾下計,三個男人一個墟...

2016-12-18 10:57

熱門評論