!-- Begin Hotmob JS SDK Tag -->

橙新聞

蔣薇|不負責電影劇透

呢個唔係影評,你可以當係吐糟、劇透、反思、討論、幻想……

【蔣薇 | 不負責電影劇透】笑唔出的星夢動物園

文:蔣薇
    
本來帶住輕鬆心情去睇《星夢動物園》,年中賣夢想嘅電影唔少,對佢唔算好大期待,甚至可以話預咗個套路係咁。不外乎一群動物追夢、遇到困難、齊心合力再完夢,事實上都係呢個套路。
  
諗住簡單寫個影評,點知愈諗愈唔對路,原來呢套戲唔簡單,幾乎寓意處處。我成日話,戲就一樣,但你睇到幾多就睇你功力,係度唔怕畫公仔畫出腸同大家分享。
  
懷才不遇、對生活有不滿想實現夢想嘅人比比皆是,十萬蚊獎金,俗,要用錢作為推動力去實現夢想,坦白講好廉價。
  
【蔣薇 | 不負責電影劇透】笑唔出的星夢動物園

(圖:劇照)

豬媽不滿自己平凡主婦生活去參賽,希望證明俾老公同仔女自己唔係普通師奶;猩猩佢有家族生意,但佢放棄咗家族生意俾佢嘅金錢生活走去唱歌;刺蝟女想證明比睇死佢嘅男朋友知自己都有才華;老鼠係最有才華嘅一隻,佢對自己好有信心,知道自己有料一心拎獎金;最後象女係最貼近大眾嘅一個,有才華但無自信,平平白白浪費自己。
  
五隻動物都幾乎講晒每個人心中同現實中嘅尋夢訴求,錢,係一個突破點,令佢有個藉口去表現自己。獎金唔簡單,佢反映咗社會上面對追夢嘅原則,你做呢樣野,搵唔搵到錢先?
  
搵唔到錢嘅算唔算夢想?算,但對其他人講,如果尋夢最終可以搵到大錢,就易理解好多。
  
【蔣薇 | 不負責電影劇透】笑唔出的星夢動物園

(圖:劇照)

片中最大亮點係一隻吹水唔抹嘴、偷呃拐騙走精面嘅樹熊。一路睇,我一路討厭呢隻樹熊,滿口夢想陳腔濫調,係佢口中永遠都有希望,係假嘅希望。
  
用現令術語講,佢係正能樣。但你睇完成套戲再分析,你就會知道,佢先係對夢想最大貢獻嘅一個。另外五隻動物唱唔成歌做唔到明星,頂多咪重回自己生活,短短幾星期嘅努力,係人生中佔據微乎其微嘅部分。講白少少,佢地從來都無跳出過自己Comfort Zone,條後路一直都係度。只有樹熊,佢賭上自己擁有嘅人生、事業、財產。
  
佢滿口正能量,但失敗之後自甘墜落。其實佢明知條路係難行,但愈難行愈無希望嘅路。佢都用正能量去面對,當佢講出「谷底反彈」呢句野時,佢內心係唔係認同?唔係,其實佢好清楚可以係谷底直到永遠。
  
當大家知道10萬獎金係騙局之後,其實帶出一個問題:如果夢想係無回報,你仲做唔做?
  
【蔣薇 | 不負責電影劇透】笑唔出的星夢動物園

(圖:劇照)

老鼠第一個走人,因為佢眼中只有錢,而另外幾隻動物都難免散水,呢段想帶出錢同夢想嘅關係。一夜反思,原來佢哋唔單單係為金錢,而係為自己,獎金誤會原來舖排出呢個反思,通常都會被大家忽略。
   
樹熊放棄夢想返返去抹車,我好明白呢種感覺,放低夢想之後回歸現實,就好似發完場夢咁,佢眼中無咗光彩同希望,好似行屍走肉咁。
  
直到最後佢哋決定要開一次演唱會,為咩?為咗一場夢有一個完美作結。樹熊佢有冇諗住翻身?無,呢一刻佢明白原來夢想同事業可以分開,佢追一個夢,唔係想發一世夢,而係完成一場自己滿意嘅夢。
  
一套動畫,比起好多大導演「監制」嘅電影來得實在,入面嘅每一個舖排都有意義,戲完入面聽到好多小朋友嘅笑聲,突然覺得原來自己已經老了。

編輯:Stacy

編輯推薦

【蔣薇 | 不負責劇透】夢寐以求的完美男友

【蔣薇 | 不負責劇透】夢寐以求的完美男友

呢款軟件只要經授權就可以拎到一個人嘅所有網上資料,再經軟件程式模擬出真人對話,用呢款軟件你就可以再次同一個已經逝去嘅人溝通,無論語氣、聲音、言辭都同佢一模一樣。

2017-01-01 12:40
【蔣薇 | 不負責劇透】網上判官的死亡筆記

【蔣薇 | 不負責劇透】網上判官的死亡筆記

故事開端由一個網上發表涼薄言論嘅女評論人開始,佢發表咗一篇文抽殘疾人士水,然後當然俾網民圍攻,係街俾人罵,FB被洗版,仲有惡意蛋糕送上門,不過女評論人唔驚,仲暗自沾沾自喜。好似童話咁,有日,呢個人憎...

2016-12-29 09:32
【蔣薇 | 不負責劇透】黑鏡背後──與豬交配的首相

【蔣薇 | 不負責劇透】黑鏡背後──與豬交配的首相

英國首相如常起床,幕僚神色凝重咁叫佢有心理準備睇一段片,段片係有綁匪綁架英國公主,佢唔提贖款,只有一個要求,要首相係今日同一隻豬交配,並將過程完全直播到網路。

2016-12-15 09:31

熱門評論