首頁

您當前的位置:三點三 > 聞西 正文

聞西

任職金融界的美食達人、作家。給單身人士的晚餐食譜,教你一個人,也要好好食,好好愛自己。

【單身食錄 | 聞西】有片睇!嘻嘻哈哈辣椒醬炒蝦麵

掃描QR Code 分享到WeChat ×

10/02/2016,橙新聞諗諗下對上一次拜年都已經係十幾年前嘅事,記憶所及拜年都係大人講是講非同埋交換禮物嘅埸合,細露仔當然開心啦,有利士逗嘛,不過都唔係無付出㗎,就係要好無聊超悶咁扮乖乖坐定定幾粒鐘都咪話唔辛苦!

唔知點解每次去拜年,我養父母大伯同伯娘都好鍾意當住我面話我呢樣唔好嗰樣唔好,又會將我同其他表哥表姐比較一番,叫我學下人哋讀書咁叻咁生性云云,但係就完全唔會提我又要煮飯又要做家務又要出工廠幫手嘅事囉,其實真係好鬼hurt我脆弱嘅小心靈㗎!

不過有一樣嘢佢哋惟一會讚我嘅就係話我好勤力做嘢,算佢哋都有少少良心啦!^^所以奉勸讀者們去拜年嘅時候,唔好再將自己個仔女同人哋比較,亦唔好踩底自己嘅仔女喇!

講返轉頭大家都知我煮嘅嘢一向都係經濟實惠㗎啦,過年都唔會有咩大富大貴嘅菜式介紹,不過平餸唔一定唔見得人嘅,例如今次要同大家介紹嘅「嘻嘻哈哈辣椒醬炒蝦麵」就絕對唔會失禮親朋戚友喇!相信嚟拜年食到主人家嘅心思會格外開心囉!好過凈係煎糕咁行貨嘛~

【材料】

海中蝦半斤,急凍貨式就得,好似今次示範所用嘅半斤都係35蚊,買嘅時候最緊要留意蝦頭唔好甩甩下,另外蝦頭唔好發黑頭就OK啦!

洋蔥1個、中size椰菜半個、蒜蓉1湯匙(有時候懶得自己剁我會用李錦記嗰隻油浸蒜蓉)。唐芹1棵、水份大約200ml(多少自己再調節)。

油麵12兩,點解用油麵?因為油麵無咁容易吸汁膨脹變稔身囉,或者試試用食之不盡嘅蘿蔔糕芋頭糕切粒代替都可以㗎!咁就連煎糕嘅功夫都慳番!呵呵~

【調味料】

冠益華記辣椒醬、茄汁及豆瓣醬各2湯匙,係咁多喇!鹽同豉油都可以慳返!想重味啲就每樣加多少少啦!ok~

【做法】

1. 將蝦鬚剪去,喺蝦背鎅開一刀至蝦尾,然後用1茶匙紹興酒同少少胡椒醃15分鐘。

2. 洋蔥同椰菜切粗絲,唐芹洗淨切段。

3. 中火燒熱易㓗鑊,落油先炒洋蔥至半熟開始呈現半透明狀態,之後中蝦落鑊煎香兩面。

4. 落調味料及蒜蓉繼續炒香,記得轉細火咁就唔會咁易燶底啦!之後再落埋油麵同椰菜略炒。

5. 加入水再將材料炒勻,然後冚蓋煮10分鐘至收汁,最後落埋唐芹略炒就上碟喇!

好在我編輯都有份試味,可以做證呢個餸真係好易做又好味道(自讚mode啟動)hehe……

你可能喜歡

熱門評論

為橙新聞OrangeNews「讚好」 ×
橙新聞 每日發現新鮮!